Актуелно

Никогаш не купувајте евтини продолжни кабли од пазар, поука од професор по извештајот за пожарот во болницата

Професорот Дејан Трајковски се огласи со свој став во однос на официјалниот извештај за пожарот во модуларната болница во Тетово кој се случи на 8.септември вечерта.

-Сѐ што ве интересира добивате со еден клик -

-Во извештајот за пожарот во модуларната болница во Тетово се вели: „Со вештачењето се утврдува дека пожарот настанал како последица од ЕЛЕКТРИЧНА КУСА ВРСКА преку ВИСОК ПРЕОДЕН ОТПОР во приклучниот кабел на дефибрилатор со кој се вршела реанимација на пациент во една од болничките соби. Прегревањето на кабелот предизвикало палење во приклучната кутија од продолжителниот кабел на кој бил приклучен дефибрилаторот, полнач за мобилен телефон и уште еден апарат“.

Инаку, куса врска (нула ома) и висок преоден отпор (многу оми) се поими кои взаемно се исклучуваат. Можеби се мисли дека имало висок преоден отпор во контактот помеѓу утикачот и утичницата, поради што се запалила изолацијата на спроводниците во утикачот или утичницата, па тоа предизвикало куса врска и понатаму палење на кабелот. Всушност, ако настанала куса врска поверојатно е да се запалила инсталацијата во ПУР пената од ѕидот. Но, тоа е многу малку веројатно, затоа што осигурачите би исклучиле моментално, под услов да биле исправни. Можно е продолжниот кабел да бил неисправен (на пазар се продаваат неквалитетни турски продолжни кабли со тенки спроводници и лоши контакти), но прегревањето настапува постепено, сигурно утикачот бил топол на допир и морало да се почувствува мирис на изгорен бакелит, пред да се запали, смета проф. Трајковски.

Тој вели дека во секој случај доколку продолжниот кабел бил исправен (изработен според стандарди), електричната инсталација во ѕидот била исто така според стандарди, а осигурачите исправни, немало шанси да се случи запалување на кабелот, дури дефибрилаторот да бил неисправен и да повлекол премногу струја.

-Високи преодни отпори не можат да се појават во исправен продолжен кабел. Заклучок: никогаш не купувајте евтини продолжни кабли од пазар. Независно од причината за палењето, доколку ѕидовите не биле од ПУР пена, туку биле почитувани препораките на Здружениот истражувачки центар (Joint Research Center – JRC) на Европската комисија (EC), според кои ковид-болниците со висока концентрација на кислород треба да се градат според стандардите за хемиски фабрики, немало да дојде до ширење на пожарот. Несереќен сплет на околности, но истовремено опомена дека истото може да се повтори во преостанатите модуларни болници со ѕидови и тавани од ПУР пена. Проблемот останува и катастрофата само чека повторно да се случи, заклучува тој.

To Top