Министерот за финансии на САД оди во Јужна Кореја зa нови санкции против Северна Кореја
Американскиот министер за финансии Џенет Јелен ќе ја посети Јужна Кореја следниот месец за да разговара за зголемената инфлација и можните нови санкции против Северна Кореја поради нејзината нуклеарна програма, изјави во петокот информиран извор.
Јелен ќе се сретне со високи јужнокорејски претставници во рамките на посетата на Азија, каде што ќе присуствува на состанокот на министрите за финансии на 20-те најголеми светски економии, рече изворот.
Портпаролот на Министерството за финансии одби да ги коментира наводите.
Деталите се уште не се целосно разработени, но Јелен би можела да разговара за Северна Кореја со јужнокорејската министерка за надворешни работи Парк Џин и министерот за финансии Чу Кјунг-хо. Разузнавачките служби од двете страни на Пацификот се загрижени дека земјата го подготвува својот прв нуклеарен тест по пет години.
Севернокорејскиот лидер Ким Џонг-ун нареди зајакнување на одбранбените капацитети на крајот од состанокот со највисоките воени претставници, објавија во петокот државните медиуми, што предизвика шпекулации во Јужна Кореја дека Пјонгјанг има намера да додаде тактичко нуклеарно оружје во својот арсенал.
