По пребарани 1.400 километри, пронајдена радиоактивната капсула од осум милиметри
Австралиските власти објавија дека е пронајдена радиоактивна капсула, која минатата недела беше изгубена во Западна Австралија и предизвика паника.
Потрагата по капсулата, која испадна од камион на патека долга 1.400 километри низ Западна Австралија меѓу градовите Њуман и Перт, траеше една недела, пренесува Ројтерс.
Камионот со капсулата пристигнал во складиштето во Перт на 16 јануари, а службите за итни случаи биле известени за исчезнатата капсула дури на 25 јануари.
Властите се сомневаат дека вибрациите од камионот предизвикале олабавување на завртките, а капсулата испаднала од пакетот, а потоа и од отворот во камионот.
Јадрото на капсулата содржи мала количина на радиоактивен цезиум-137, кој може да предизвика сериозни болести доколку се допре.
Капсулата е со димензии осум милиметри на шест милиметри.
Цезиум-137 е радиоактивен изотоп на цезиум со полуживот од 30 години.
Неговото ослободување се случува преку употреба на нуклеарно оружје, како и во случаи на несреќи во нуклеарни централи, поради што претставува голем ризик за животната средина, според Енциклопедија Британика.
Компанијата Рио Тинто пред три дена се извини за загубата на капсулата.
