Општина Центар на 6 април ќе организира бесплатни здравствени консултации за граѓаните, во пресрет на Светскиот ден на здравјето, информира градоначалникот Горан Герасимовски.
Акцијата ќе се одржи во Општинскиот младински центар „Матично“ во период од 09:00 до 15:00 часот, каде граѓаните ќе можат да добијат бесплатни совети и да направат превентивни проверки.
„Ги поканувам граѓаните да дојдат и да се консултираат со тим специјалисти, да направат мерење на крвен притисок и шеќер во крвта и да добијат бесплатни совети. Целта е да ја поттикнеме свеста за грижата за сопственото здравје и значењето на превентивните контроли. Здравото население е најголемото богатство“, изјави Герасимовски.
Во рамки на настанот, граѓаните ќе имаат можност да разговараат со гинеколог, ортопед, дерматовенеролог и инфектолог, додека студенти по медицина ќе вршат мерење на крвен притисок и гликоза.
Во стручниот тим се вклучени и советници во Советот на Општина Центар, а активноста се реализира во соработка со ХЕРА – Асоцијација за здравствена едукација и истражување.
Од Општината посочуваат дека продолжуваат со активности насочени кон унапредување на квалитетот на живот и промоција на здрави навики кај граѓаните.
