„Целта е да бидеме земја во која трудот се почитува, знаењето се вреднува, а работата обезбедува достоинствен живот“, вели Мицкоски

Премиерот Христијан Мицкоски порача дека Македонија треба да биде држава во која трудот е праведно вреднуван, работниците имаат сигурност, а младите можат да градат иднина во сопствената земја. Ова го истакна на потпишувањето на Националната програма за достоинствена работа за периодот 2026–2030 година.

— реклама —

Мицкоски нагласи дека меѓу главните предизвици на пазарот на трудот се недостигот од квалификувани работници, иселувањето на младите, ниската продуктивност и неусогласеноста меѓу образованието и потребите на компаниите.

Тој посочи дека владините политики треба да поттикнат инвестиции во квалитетни и добро платени работни места, развој на нови вештини, подобри работни услови и поголема продуктивност. Според него, успешните компании и задоволните работници се меѓусебно поврзани и претставуваат основа за силна економија.

— реклама —

Посебен акцент стави на задржувањето на младите во земјата и создавањето повеќе можности за економско зајакнување на жените, нивно поголемо учество на пазарот на трудот и еднаков професионален развој.

— реклама —

Како приоритети на новата програма ги посочи реформите на трудовото законодавство, модернизацијата на институциите, зајакнувањето на инспекцискиот надзор, развојот на вештините и подобрувањето на конкурентноста на претпријатијата.

Мицкоски нагласи дека успехот на програмата ќе се мери според конкретните резултати што ќе ги почувствуваат граѓаните – поголема сигурност за работниците, подобри можности за младите, еднакви шанси за жените и услови за компаниите да инвестираат и да отвораат работни места.

„Достоинствениот труд не е привилегија. Тој е право. А достоинствениот живот не смее да биде недостижна желба. Тој мора да биде реалност, реална можност за секој наш граѓанин“, порача Мицкоски.