Цените на нафтата не паѓаат под 100 долари, расте загриженоста на пазарите

Цените на нафтата на светските пазари повторно пораснаа и надминаа 104 долари за барел, поради стравувањата дека мировните разговори меѓу САД и Иран нема да донесат значителен напредок.

— реклама —

На лондонскиот пазар цената на барелот се зголеми за 1,72 долари и достигна 104,30 долари, додека на американскиот пазар барелот се тргуваше за 97,83 долари.

Инвеститорите првично беа охрабрени од информации дека разликите меѓу Вашингтон и Техеран се намалуваат, но пазарите повторно реагираа негативно откако стана јасно дека клучните спорни прашања остануваат нерешени. Меѓу нив се збогатувањето на ураниум и контролата врз Ормускиот теснец.

— реклама —

Марко Рубио изјави дека постојат „добри знаци“ во разговорите, но нагласи дека евентуална наплата за транзит низ Ормускиот теснец би била неприфатлива за Вашингтон.

— реклама —

Аналитичарите предупредуваат дека пазарите остануваат скептични бидејќи и претходно имало сигнали за договор, по што преговорите пропаѓале.

Дополнителна загриженост предизвикува и можноста високите цени на енергенсите повторно да ја поттикнат инфлацијата, што би можело да ги натера централните банки да ги зголемат каматните стапки.

— реклама —

Според проценките, околу 20 проценти од светските испораки на енергија минуваат низ Ормускиот теснец, а блокадите и намалените испораки од регионот веќе влијаат врз глобалното снабдување со нафта.