Цените на нафтата паднаа под 84 долари за барел

Цените на нафтата денеска паднаа на меѓународните пазари, при што цената на барел на лондонскиот пазар се спушти под 84 долари. Инвеститорите проценуваат дека, и покрај тензиите меѓу САД и Иран, сè уште постои простор за продолжување на транзитот на енергенси низ Ормускиот теснец.

— реклама —

На лондонскиот пазар барелот се продаваше за 83,60 долари, што е за 1,13 долари помалку од претходниот ден. На американскиот пазар цената изнесуваше 78,66 долари за барел, односно за 68 центи помалку.

— реклама —

Во изминатите денови конфликтот меѓу Вашингтон и Техеран повторно ги зголеми стравувањата за снабдувањето со нафта. Иран предупреди дека бродовите мора да користат безбеден коридор покрај неговиот брег, додека САД продолжија со нападите врз цели во јужен Иран и повторно воведоа поморска блокада на иранските пристаништа.

Дополнителна неизвесност создава можноста во конфликтот да се вклучи и јеменското движење Ансар Алах, што би можело да го загрози сообраќајот низ теснецот Баб ел-Мандеб и Суецкиот канал.

— реклама —

Сепак, аналитичарите сметаат дека пазарите засега не очекуваат поширока воена ескалација. Според Оле Хансен од „Саксо Банк“, инвеститорите веќе научиле повнимателно да реагираат на драматичните изјави, бидејќи тие често не се претвораат во конкретни потези.

Во меѓувреме, американскиот претседател Доналд Трамп изјави дека блокадата се однесува само на Иран и дека останатите бродови можат непречено да пловат низ Ормускиот теснец.