Цените на нафтата повторно растат по новите тензии меѓу САД и Иран

Цените на нафтата денеска пораснаа на меѓународните пазари откако американскиот претседател Доналд Трамп го оцени како „целосно неприфатлив“ иранскиот одговор на американскиот предлог за прекин на војната, што повторно ги засили стравувањата за глобалното снабдување со нафта.

На лондонскиот пазар, цената на суровата нафта „брент“ попладнево достигна 103,19 долари за барел, што е речиси два процента повеќе во однос на затворањето во петокот. Американската нафта WTI се тргуваше по 96,98 долари за барел, со раст од 1,6 проценти.

— реклама —

Во текот на утрото, цената на „брент“ накратко достигна 105,99 долари за барел, додека WTI надмина 100 долари, по што следуваше благо намалување.

— реклама —

Пазарите реагираа по изјавата на Доналд Трамп дека иранскиот одговор на американскиот мировен предлог е „целосно неприфатлив“. Од друга страна, иранската агенција Тасним објави дека Техеран бара прекин на војната, укинување на санкциите, крај на поморската блокада и иранска контрола врз Ормускиот Теснец.

Аналитичарите оценуваат дека пазарот на нафта во моментов е исклучително чувствителен на секоја изјава од САД и Иран, а цените се менуваат по секоја нова геополитичка порака.

— реклама —

Во фокусот на инвеститорите сега е и најавената посета на Доналд Трамп на Кина, каде што треба да разговара со кинескиот претседател Си Џинпинг, меѓу другото, и за кризата со Иран.

Извршниот директор на Saudi Aramco, Амин Насер, предупреди дека светот во последните два месеца изгубил околу милијарда барели нафта и дека, дури и ако се нормализира ситуацијата во Ормускиот Теснец, ќе бидат потребни месеци за стабилизирање на снабдувањето.

Во меѓувреме, според аналитичката компанија Kpler, минатата недела три танкери успеале да поминат низ теснецот, што дава ограничени знаци за можно постепено обновување на транспортот на нафта.