Грчкиот Црвен крст издаде упатства за прва помош при повреди предизвикани од сребренообразната риба-пуферка (Lagocephalus sceleratus), откако сè почесто се забележува во грчките мориња.
Од организацијата предупредуваат дека каснувањето од оваа риба не е отровно, но нејзините силни вилици налик на клун можат да предизвикаат сериозни повреди и обилно крвавење.
Во случај на каснување, се препорачува раната веднаш да се измие со чиста вода и сапун, потоа да се притисне со чиста крпа или газа за да се запре крвавењето, а повредениот дел да се подигне доколку крвавењето е посилно.
Лекарска помош треба секогаш да се побара, бидејќи може да биде потребна специјализирана нега, вакцина против тетанус или шиење на подлабоки рани. Во итни случаи треба да се повикаат службите на 166 или 112.
Овој вид риба пристигнал во Средоземното Море од Индо-Пацификот преку Суецкиот Канал. Во Грција првпат била забележана во 2005 година кај Крит и Додеканезите, а оттогаш значително го проширила своето присуство.
Научниците предупредуваат дека рибата содржи тетродотоксин – силен невротоксин кој може да предизвика сериозни последици доколку се консумира. Поради тоа, експертите велат дека ниту еден дел од рибата не треба да се јаде.
Инвазивната риба-пуферка станува сè поголем проблем во источниот Медитеран, бидејќи ги загрозува морските екосистеми и рибарството.
