Левица преку соопштение соопшти дека на денешната седница на Уставниот суд, на која се разгледуваше нивната иницијатива за оценување на уставноста на одредби од Изборниот законик, дел од уставните судии признале дека постои нееднаков третман и дискриминација кон партијата.
Од партијата наведуваат дека, иако Судот не донел конечна одлука поради недоволен број гласови и предметот останува отворен, расправата покажала дека дел од судиите сметаат оти политичкиот плурализам не може да постои без еднакви услови за сите учесници во изборниот процес.
Според Левица, судиите посочиле дека нееднаквиот третман не се однесува само на ограничениот пристап до медиумскиот простор, туку директно влијае и врз изборниот резултат, бидејќи една партија не може рамноправно да ја претстави својата програма.
Во соопштението, Левица остро ги критикува судиите Татјана Васиќ-Бозаџиева, Добрила Кацарска, Фатмир Скендер и Насер Ајдари, обвинувајќи ги дека останале на ставовите од одлуката донесена во 2023 година и покрај, како што тврдат, новите околности што произлегле од последниот изборен процес.
Партијата оценува дека дел од аргументите изнесени на седницата биле правно неиздржани, особено ставот дека евентуалното укинување на спорните одредби би создало правна празнина и дека измените треба да ги направи Собранието.
Од Левица порачуваат дека Уставниот суд треба да ја штити уставноста, а не да ги оценува политичките последици од своите одлуки, додавајќи дека институцијата не смее да биде „институција што ја конзервира неправдата“.
