Денеска завршува наставата за основците и средношколците во учебната 2025/2026 година, по што тие заминуваат на летен распуст кој ќе трае до 31 август. Матурантите наставата ја завршија уште на 15 мај и веќе ги очекуваат обврските поврзани со државната матура.
Утре, 11 јуни, матурантите што се пријавени за државна матура ќе го полагаат задолжителниот екстерен испит по мајчин јазик (македонски, албански, турски или српски), додека кандидатите за државна стручна и државна уметничка матура ќе полагаат на 12 јуни. Првиот изборен екстерен предмет тие го полагаа на 6 јуни.
Од вкупно 14.587 пријавени ученици за полагање матура, 12.184 се пријавиле за државна матура, 2.276 за државна стручна матура, а 127 за државна уметничка матура.
Во меѓувреме, полуматурантите се подготвуваат за упис во прва година средно образование. Електронското пријавување преку порталот Uslugi.gov.mk ќе се реализира во два јунски рока – од 12 до 15 јуни и на 23 јуни, додека августовскиот уписен рок е предвиден за 20 август.
Со конкурсот на Министерството за образование и наука се обезбедени повеќе од 25.000 слободни места во 109 јавни средни училишта низ државата.
