„До крајот на неделава очекувам водата во Гостивар да биде технички исправна, а идната недела и за пиење“, рече Мицкоски

Премиерот Христијан Мицкоски изјави дека очекува до крајот на оваа недела водата во Гостивар да биде технички исправна, а кон крајот на идната недела да биде безбедна и за пиење.

— реклама —

Одговарајќи на новинарско прашање, Мицкоски рече дека на терен се вклучени екипи од ЈП „Водовод и канализација“ – Скопје и експерти, кои работат на надминување на проблемот.

„Очекувам до крајот на оваа недела да имаме технички исправна вода во Гостивар. Сега треба да се пристапи кон целосно перење на системот, за да може да добиеме вода што ќе има нормални граници на хлор и ќе биде добра за техничка употреба. Ако сè оди според планот, кон крајот на идната недела таа вода ќе биде добра и за пиење“, изјави Мицкоски.

— реклама —

Тој додаде дека Владата продолжува да работи на решавање на проблемот, оценувајќи дека состојбата во општината претставува дополнителен предизвик.

— реклама —

„За жал, летаргијата што ја зафати општината по овој случај претставува предизвик за сите нас. Иако постои несинхронизираност меѓу општината и Владата, ние ќе сториме сè што е во наша моќ системот што поскоро да профункционира и повторно да биде ставен во употреба“, рече премиерот.