„Додека заменик директорот на „Македонски шуми“ слави роденден на ДПМНЕ, шумската мафија ја пустоши и Јабланица“, велат од Левица

Левица преку соопштение повторно алармира за, како што наведуваат, масовна нелегална сеча на дрвја, овојпат на планината Јабланица, обвинувајќи ги надлежните институции за неактивност и барајќи оставки од раководството на ЈП „Македонски шуми“.

— реклама —

Од партијата посочуваат дека по нивните претходни обвинувања за нелегална сеча на планината Лопушник и барањата за одговорност од директорот Здравко Трајанов и заменик-директорот Кире Михаилов, не добиле никаков одговор од претпријатието.

— реклама —

Левица денеска објави фотографии за кои тврди дека прикажуваат нелегална сеча на Јабланица. Според информациите што ги добиле од локални жители, на планината речиси секој викенд се сечат немаркирани дрвја, додека институциите не преземаат мерки за спречување на ваквите активности.

Од партијата оценуваат дека особено загрижува фактот што процесот за прогласување на Јабланица за национален парк со години не е завршен. Според нив, ваквата состојба овозможува продолжување на уништувањето на шумските ресурси и создава простор за нелегални активности.

— реклама —

Во соопштението се наведува дека ревизорските извештаи за ЈП „Македонски шуми“ со години укажуваат на сериозни проблеми во работењето на претпријатието, а наместо зајакнување на контролата и капацитетите на шумската полиција, според Левица, се спроведува партизација на институцијата.

— реклама —

Од Левица најавуваат дека ќе продолжат да бараат оставки од директорот Здравко Трајанов и заменик-директорот Кире Михаилов, оценувајќи дека не се преземаат доволно мерки против нелегалната сеча и уништувањето на македонските шуми.