Донирани органи спасија два животи: Направени трансплантации на црн дроб и бубрег во Скопје

Во момент на длабока лична загуба, едно семејство донесе одлука што значи живот, овозможувајќи да бидат спасени и подобрени животите на двајца пациенти преку трансплантација на органи.

— реклама —

Со нивната согласност, успешно е извршена трансплантација на црн дроб кај 67-годишен пациент, додека на 51-годишна пациентка ѝ е пресаден бубрег, со што доби нова шанса за поквалитетен живот. Двајцата пациенти се во добра општа состојба и се пуштени на домашно лекување.

МЗ

Министерот за здравство Азир Алиу посочи дека станува збор за чин на исклучителна хуманост и солидарност.

— реклама —

„Овие медицински интервенции се приказни за надеж и за највисок чин на алтруизам. Нема поголем чин од тоа во момент на болка да подарите живот. Ова семејство покажа што значи вистинска хуманост, нивната одлука ќе живее преку тие на кои им е дадена нова шанса“, изјави Алиу, изразувајќи благодарност до семејството на донорот.

— реклама —

Националната координаторка за трансплантација, проф. д-р Билјана Кузмановска, исто така упати благодарност, нагласувајќи дека зад секоја трансплантација стои човечка приказна.

„Овој пат тоа е приказна за храброст и дарување живот. Тоа е највисокиот чин на солидарност што едно општество може да го има“, истакна Кузмановска.

Во реализацијата на трансплантациите учествувале тимови од повеќе клиники, меѓу кои Клиниката за анестезија, реанимација и интензивно лекување, Клиниката за дигестивна хирургија, Клиниката за урологија, Клиниката за гастроентерохепатологија, Клиниката за нефрологија и Институтот за трансфузиологија, чии медицински екипи беа посочени како клучни за успешниот исход.