Целосно обновено и со нов изглед, детското игралиште „Дрвен“ во Дебар Маало повторно е ставено во функција, со нови реквизити, летниковец и уреден простор за најмладите, информираа од Општина Центар.
Станува збор за едно од најпознатите игралишта во овој дел од Скопје, лоцирано на улицата „Славка Недик“, кое по реконструкцијата доби современ и побезбеден изглед. Поставени се нови лулашки, клупи и корпи за отпадоци, додека просторот е дополнително уреден со жардињери и летниковец за одмор.
Интервенирано е и на кошаркарското игралиште, каде што е обновена оградата, а во делот наменет за најмалите поставена е нова гумена подлога, со цел зголемена безбедност и издржливост на временски услови. Дополнително, поставено е и ново амбиентално осветлување, вклучително и централна црвена канделабра.
Градоначалникот Горан Герасимовски изјави дека ова е дел од поширока акција за уредување на детските игралишта во општината.
„Продолжуваме со реконструкција кај КАМ маркет, кај ‘Зебра’ и на сите детски игралишта каде што има оштетени реквизити. Истите ќе бидат заменети во текот на овој месец“, рече Герасимовски.
Тој упати апел до граѓаните за одговорно користење и зачувување на јавниот простор и урбаната опрема.
