Левица преку соопштение обвини дека континуираниот раст на цените на становите во Скопје ги оттурнува граѓаните од можноста да дојдат до сопствен дом и ги принудува да живеат под кирија.
Од партијата се повикуваат на најновите податоци на Народната банка, според кои цените на становите во главниот град во вториот квартал од годинава се зголемиле за 13,3 проценти на годишно ниво.
Според Левица, растот на цените се случува во услови кога, како што наведуваат, македонските работници имаат најниски примања во Европа, што дополнително ја намалува можноста за купување сопствено живеалиште.
Партијата оценува дека институциите не преземаат мерки за регулирање на пазарот на недвижности и тврди дека постојат тесни врски меѓу носители на јавни функции и големиот градежен бизнис, што, според нив, овозможува монопол и одржување на високите цени.
Како решение, Левица предлага Јавното претпријатие за стопанисување со станбен и деловен простор да започне масовна изградба на државни станови по пристапни цени, со што, според партијата, би се извршил притисок врз приватниот сектор да ги намали цените.
Воедно, бараат Обвинителството, Државниот пазарен инспекторат, Управата за јавни приходи и градежните инспекторати да спроведат засилени контроли на потеклото на капиталот во градежниот сектор, како и да се справат со корупцијата и незаконското урбанистичко планирање.
Од Левица порачуваат дека, доколку не се преземат конкретни мерки, граѓаните ќе продолжат да се соочуваат со сè помали можности за купување сопствен дом и ќе бидат принудени да останат под кирија или да ја напуштат државата.
