Двојна прослава во Скопје: Центар и Гази Баба слават 50 години од основањето

Општините Центар и Гази Баба одбележаа значајни јубилеи – 50 години од своето постоење. По повод половина век историја, развој и заедништво, беа организирани свечени настани на кои присуствуваше и градоначалникот на Град Скопје, Орце Ѓорѓиевски.

Ѓорѓиевски на социјалните мрежи сподели фотографии од двете свечености, упатувајќи честитки до граѓаните и раководствата на општините.

На покана на градоначалникот на Центар, Горан Герасимовски, Ѓорѓиевски присуствувал на свеченото одбележување на 50-годишнината на општината, заедно со градоначалникот Сотир Лукровски.

— реклама —

„Центар е срцето на нашиот град. Тука се среќаваат историјата и современиот живот, тука се чуваат спомените на старо Скопје и се создаваат приказните на новите генерации“, напиша Ѓорѓиевски, посочувајќи дека јубилејот им припаѓа на сите кои со својот труд, знаење и љубов го граделе Центар.

— реклама —

Тој упати честитки и до Општина Гази Баба, каде што на покана на градоначалникот Бобан Стефковски присуствувал на свечената академија по повод 50 години од постоењето на општината.

За Гази Баба, Ѓорѓиевски истакна дека е дом на вредни и чесни луѓе и на генерации кои со својот труд и знаење придонеле за развојот на Скопје.

— реклама —

Во објавата тој му честиташе на Стефковски за посветеноста и развојот на општината, најавувајќи дека Град Скопје ќе продолжи да биде поддршка и партнер во реализацијата на капитални проекти.

„Заедно ќе ги решаваме долгогодишните проблеми и ќе создаваме услови младите тука да ја гледаат својата иднина, а секое семејство да живее подобро и подостоинствено“, порача градоначалникот на Скопје.

— реклама —

Ѓорѓиевски им посака на жителите на двете општини уште многу години напредок, благосостојба и заеднички успеси, нагласувајќи дека 50-годишните јубилеи се обврска за создавање дела со кои ќе се гордеат идните генерации.