Експертите предупредуваат: Последиците од екстремната топлина можат да траат со денови

Иако многумина мислат дека опасноста завршува кога ќе се намалат температурите, експертите предупредуваат дека последиците од изложеноста на екстремна топлина можат да траат со денови, па дури и недели.

— реклама —

Според нив, најризични се постарите лица, хронично болните, бремените жени, малите деца и луѓето што работат или престојуваат подолго време на отворено, но продолжената изложеност на високи температури може да влијае и врз здрави лица.

За време на жештините, организмот е под дополнителен напор бидејќи постојано се обидува да ја одржи нормалната телесна температура преку потење, при што губи големи количини течности и електролити. Тоа дополнително ги оптоварува срцето, бубрезите и другите органи.

— реклама —

Една од најчестите последици е долготрајниот замор, кој може да биде проследен со намалена концентрација, слабост и потешкотии во извршувањето на секојдневните обврски. Кај некои лица може да продолжат и главоболки, вртоглавица и чувство на нестабилност поради дехидрација и нарушена рамнотежа на електролитите.

— реклама —

Лекарите предупредуваат дека високите температури можат дополнително да го оптоварат кардиоваскуларниот систем, особено кај лицата со висок крвен притисок или срцеви заболувања. Воедно, тие советуваат пациентите да не ја менуваат терапијата без консултација со лекар.

Топлината може привремено да ја наруши и функцијата на бубрезите, а симптоми како темна урина, намалено мокрење, силна жед, замор и оток на нозете бараат лекарска проценка доколку траат подолго.

Експертите посочуваат дека високите ноќни температури го нарушуваат и квалитетот на сонот, што може да доведе до раздразливост, послаба концентрација и побавни реакции, додека сè повеќе истражувања покажуваат дека продолжената топлина може негативно да влијае и врз менталното здравје, предизвикувајќи зголемена анксиозност и исцрпеност.