Повеќе протеини не значи секогаш и подобро здравје. Ново истражување објавено во списанието Cell Press Blue сугерира дека кај возрасните кои не се особено физички активни, помалиот внес на протеини би можел да биде поврзан со поздраво стареење, па дури и со подолг живот.
Научниците анализирале повеќе од 350 истражувања спроведени на луѓе, глувци и други организми. Според нивните наоди, намалувањето на внесот на протеини може да влијае врз метаболизмот, начинот на кој клетките реагираат на хранливите материи, да ги намали оштетувањата на клетките и да го подобри нивното функционирање.
Сепак, ефектите не се исти кај сите. Тие зависат од возраста, здравствената состојба и физичката активност на човекот.
„Целосно е јасно дека протеините имаат позитивен ефект врз растот на мускулите и одговорот на организмот на физичката активност кај луѓето кои вежбаат“, вели еден од авторите на истражувањето, Дадли Ламинг од Универзитетот Висконсин-Медисон.
Според него, бидејќи голем дел од луѓето водат релативно седентарен начин на живот, можно е многумина да внесуваат повеќе протеини отколку што реално им се потребни, што би можело да има негативни последици по здравјето.
Неколку понови истражувања кај луѓе покажале дека помалиот внес на протеини може да помогне во намалување на телесната тежина и процентот на масно ткиво, а истовремено да придонесе за подобра регулација на шеќерот во крвта.
Истражувањето покажало и дека прекумерниот внес на метионин, изолеуцин и валин – аминокиселини од кои се изградени протеините – може да биде поврзан со поголем ризик од дебелина, воспаленија и други заболувања поврзани со стареењето.
Од друга страна, повисокиот внес на протеини, особено во комбинација со редовна физичка активност, може да има поинаков ефект, особено кај повозрасните лица.
Затоа научниците нагласуваат дека оптималната количина протеини не е иста за секого и дека потребите зависат од начинот на живот и физичката активност.
