Земјите-членки на Европската Унија денеска се обидуваат да постигнат договор за 21. пакет санкции против Русија пред истекот на клучниот рок утре. Доколку не се постигне согласност, Брисел би можел да биде принуден да ја зголеми горната граница на цената на руската нафта, што би ѝ овозможило на Москва да оствари поголеми приходи од извозот.
Амбасадорите на 27-те земји-членки во Брисел до доцна вечерва ќе се обидуваат да ги усогласат ставовите, но исходот останува неизвесен поради несогласувањата околу неколку делови од предложените мерки.
Една од најважните мерки е ограничувањето на цената на руската нафта. Според важечките правила, нејзината максимална цена треба да се усогласи со растот на светските цени на нафтата, кои пораснале поради конфликтот на Блискиот Исток. Европската комисија сака ова ограничување да остане на сегашното ниво уште неколку месеци, за да се спречи Русија дополнително да профитира од повисоките цени на енергенсите.
Сепак, предлогот за новите санкции наиде на отпор кај дел од земјите-членки. Бугарија се спротивставува на ставањето на рускиот патријарх Кирил на листата на санкционирани лица. Германија, според дипломатски извори, не ја поддржува забраната за увоз на одредени видови риба од Русија, додека неколку држави бараат ублажување на предлогот за забрана за издавање визи на сите Руси кои учествувале во војната во Украина.
Високата претставничка на ЕУ за надворешна политика и безбедност, Каја Калас, изјави дека Унијата е „многу блиску“ до договор.
„Целта ни е да постигнеме договор. Ако не успееме, ќе почнеме да работиме на резервно решение“, порача Калас.
Неуспехот да се усвои новиот пакет санкции би претставувал политички удар за Европската Унија, особено во период кога, според оценките на Брисел, Украина бележи напредок на фронтот. Во таа насока, претседателката на Европската комисија, Урсула фон дер Лајен, утре ќе престојува во Киев, каде што ќе се сретне со украинскиот претседател Володимир Зеленски.
