Фон дер Лајен: Преговорите со Украина треба да започнат без одлагање

Претседателката на Европската комисија Урсула фон дер Лајен денес во Лефкозија на Кипар изјави дека преговорите за пристапување на Украина во Европската Унија треба да започнат без одлагање.

— реклама —

„Храбриот отпор на Украина против Русија е непоколеблив. Исто така и поддршката од Европа. Со оглед на континуираните реформски напори на Украина, преговорите за пристапување треба да започнат без одлагање“, напиша Фон дер Лајен на платформата Икс, по трилатералниот состанок со претседателот на Европскиот совет Антонио Кошта и претседателот на Украина Володимир Зеленски, пред неформалниот состанок на претседателите на држави или влади на ЕУ кој се одржува на Кипар.

Фон дер Лајен, Кошта и Зеленски во заедничката изјава истакнаа дека кредитот за поддршка на Украина ќе обезбеди земјата да може да ги покрие своите итни буџетски и одбранбени потреби, овозможувајќи ѝ да остане отпорна на тековните руски напади, објавено е на веб-страницата на ЕУ.

— реклама —

Тие нагласија важност за брза имплементација на кредитот и очекуваат прва исплата во вториот квартал. Исто така повикаа трети земји да помогнат да се пополнат преостанатите финансиски празнини на Украина.

— реклама —

Тие го поздравија и усвојувањето на 20-тиот пакет санкции чија цел е намалување на руските енергетски приходи, ограничување на банкарскиот систем и сузбивање на операциите на т.н. „флота во сенка“, и истакнаа потреба од понатамошен притисок врз Русија за прекин на агресијата и почеток на значајни мировни преговори.

Фон дер Лајен и Кошта повторно ја потврдија посветеноста на Унијата за поддршка на Украина, во координација со меѓународните партнери, за итна поправка и обнова на енергетската инфраструктура и зајакнување на енергетскиот систем пред следната зима.

Во пресрет на 40-годишнината од катастрофата во Чернобил, тие потсетија на важноста на нуклеарната безбедност во Европа и повикаа Русија да престане со нападите и окупацијата на нуклеарните постројки во Украина. Тие ја поздравија и најавата за состанок на високо ниво на Меѓународната коалиција за враќање на украинските деца, кој ќе биде организиран од ЕУ, Украина и Канада, а ќе се одржи на 11 мај во Брисел.