Пратеникот од Левица, Реџеп Исмаил, објави анализа во која го доведува во прашање ефектот од најавениот закон за игри на среќа, со кој казината треба да бидат оддалечени најмалку 500 метри од основните и средните училишта.
Исмаил посочува дека на прв поглед ограничувањето изгледа строго и би можело значително да го намали просторот за отворање казина во делови од Скопје, како Центар, Карпош и Аеродром. Сепак, според него, клучниот проблем е што во законот не е наведено дека растојанието ќе се мери по воздушна линија.
„Наместо тоа, се користи формулацијата ‘најбезбеден пат’, што остава простор многу објекти што се блиску до училишта да останат легални поради подолг пристап преку улици, мостови, подземни премини или други објекти“, наведува Исмаил.
Тој предупредува дека ваквата формулација може да доведе до „креативни“ толкувања и создавање т.н. коцкарски оази во делови од градот каде што ограничувањата нема реално да се применуваат.
Според Исмаил, суштинското прашање е дали целта е вистинско оддалечување на коцкарската индустрија од децата и младите или носење закон што формално изгледа строг, но остава простор за исклучоци.
Во анализата се посочува и дека проблемот со прекумерното коцкање во Македонија е сериозен, при што годишниот обрт во индустријата достигнува над 2,8 милијарди евра, што, според него, носи сериозни социјални и економски последици.
