Франција планира значително да ги зголеми залихите на ракети и дронови – до 400 проценти до 2030 година, според нацрт-законот за воено планирање во кој увид имал Politico.
Тековните конфликти во Украина и на Блискиот Исток покажаа колку брзо се троши муницијата во интензивно војување. Поради тоа, Париз издвојува милијарди евра за зголемување на залихите и за замена на противвоздушните ракети што француското воздухопловство ги употребило за одбрана од ирански дронови.
„Итната потреба е, секако, за муниција“, изјави францускиот министер за одбрана Себастијан Лекорни, во услови на растечки стравувања во Европа од потенцијален конфликт со Русија до крајот на деценијата.
Француската влада на 8 април ќе го претстави ажурираниот закон за воено планирање, со кој се предвидуваат 8,5 милијарди евра за дронови и ракети до 2030 година.
Планот предвидува значително зголемување на буџетот за одбрана – до 76,3 милијарди евра до 2030 година. Истовремено, Франција сака да ги зголеми залихите на „камиказе“ дронови за 400%, водени бомби за 240% и ракети за околу 30%.
И покрај ова, нема планови за значително проширување на вооружените сили, ниту за купување нови борбени авиони „Рафал“ или фрегати.
Документот укажува дека земјата се подготвува за таканаречена „воена економија“, при што се очекува и зголемување на индустриското производство на оружје.
Францускиот претседател Емануел Макрон и владата се соочуваат со притисок да обезбедат побрзо производство, додека производителите бараат повеќе нарачки.
Париз размислува и за развој на нов тенк како замена за „Леклер“, поради можни доцнења во заедничкиот француско-германски проект.
Иако планот важи до 2030 година, се очекува нова стратегија по претседателските избори во 2027 година.
