Франција порача дека Иран никогаш не смее да добие нуклеарно оружје, но решението за тоа мора да се бара исклучиво преку дипломатски средства, соопшти француското Министерство за надворешни работи.
„Министерот ја потврди целта Иран никогаш да не стекне нуклеарно оружје и ја повтори решеноста на Франција и нејзините партнери од Е3 да го постигнат овој резултат по дипломатски пат“, соопшти портпаролот на Министерството.
Во рамки на разговорите, Франција изразила целосна поддршка за Меѓународна агенција за атомска енергија во спроведувањето на нејзиниот мандат за надзор на неширењето на нуклеарно оружје и промовирање на мирољубива употреба на нуклеарната енергија.
Темата била отворена на 11-тата конференција за ревизија на Договорот за неширење на нуклеарно оружје, каде фокусот бил ставен на зајакнување на меѓународната поддршка за овој механизам.
Според француското соопштение, учесниците изразиле надеж дека конференцијата ќе резултира со заедничка потврда на поддршката за договорот од страна на сите држави потписнички.
Франција дополнително ја нагласила својата поддршка за активностите на МААЕ, вклучително и оние поврзани со нуклеарната безбедност во Украина и обновата на заштитната инфраструктура во Чернобил, во рамки на ангажманот на групата Г7.
Позицијата на Париз доаѓа во момент на зголемени тензии на Блискиот Исток, каде нуклеарното прашање повторно станува една од клучните точки на глобалната безбедност.
