Екстремниот топлотен бран што ја зафати Франција доведе до привремено намалување на производството на нуклеарна енергија за околу 4,1 гигавати, што претставува приближно седум проценти од вкупната побарувачка за електрична енергија во земјата.
Според податоците на францускиот оператор на електропреносната мрежа РТЕ и државната електроенергетска компанија ЕДФ, реакторот „Голфеш 2“ на реката Гарона привремено бил исклучен од мрежата поради екстремно високите температури.
Како што пренесува порталот „Нуклеарна перспектива“, нуклеарните централи се проектирани да функционираат и при многу високи надворешни температури, па горештините не ја загрозуваат нивната безбедност. Сепак, проблемот се јавува поради загревањето на реките што се користат за ладење на реакторите.
Централите со отворен систем за ладење користат речна вода за ладење на кондензаторите, по што ја враќаат назад во реката, загреана за неколку степени. Кога температурите се екстремно високи, како што беше случајот деновиве, кога во Франција беа измерени над 44 Целзиусови степени, и самите реки значително се загреваат.
Француските еколошки прописи строго ја ограничуваат максималната дозволена температура на водата што се испушта во реките, со цел да се заштити живиот свет, особено рибниот фонд и речната флора.
Доколку температурата на реката ја достигне критичната граница, компанијата ЕДФ е законски обврзана да ја намали моќноста на реакторите или привремено да ги исклучи, за да се избегне дополнително загревање на водата и нарушување на екосистемот.
Експертите посочуваат дека реакторите не се исклучуваат затоа што не можат да работат, туку за да се спречи прегревање на реките и да се зачува природната средина.
