Франција се откажува од Windows, преминува на Linux за поголем дигитален суверенитет

Француската влада најави целосна миграција од „Виндоус“ кон системи базирани на „Линукс“, со цел да го зајакне дигиталниот суверенитет и да ја намали зависноста од технологии надвор од Европа.

— реклама —

Одлуката следува по претходни чекори на локално ниво, откако Лион минатата година се откажа од „Виндоус“ и „Мајкрософт офис“ во корист на бесплатни и отворени софтверски решенија.

— реклама —

Во текот на април, повеќе владини институции одржале заеднички состанок на кој било договорено да се намали зависноста од „воневропски“ технологии и да се даде предност на решенија развиени во рамки на Европската Унија. Како дел од стратегијата, Меѓуресорската управа за дигитални технологии ќе спроведе замена на оперативните системи на владините компјутери со „Линукс“-базирани решенија, иако конкретната дистрибуција сè уште не е утврдена.

Покрај тоа, се планира и миграција на платформите за здравствени податоци кон, како што се наведува, „доверливо решение“, а секое министерство има задача до есен да подготви сопствен план за транзиција. Стратегијата ќе опфати персонални компјутери, алатки за онлајн соработка, антивирусни системи, бази на податоци, решенија со вештачка интелигенција и мрежна инфраструктура.

— реклама —

Францускиот министер Давид Амиел изјави дека државата повеќе не може да ја прифаќа својата зависност од странски технолошки решенија и дека мора да ја преземе контролата врз сопствената дигитална иднина.

Ова не е изолиран случај во Европа. Данска исто така најави напуштање на „Виндоус“ и „Офис“, додека Минхен претходно се врати на системите на „Мајкрософт“ по десетгодишна употреба на „Линукс“.