Франција се подготвува за нов бран масовни протести: Париз воведува полициски час

Во Франција денеска повторно се очекуваат масовни протести, поради што властите одлучија да ги задржат полицискиот час и ограничувањата за собирање граѓани, откако демонстрантите претходно овој месец предизвикаа голема материјална штета во неколку градови.

Поради страв од нови немири, во Париз е забрането одржување протестни поворки во центарот на главниот град, а нивно одржување е одобрено само во пооддалечените делови на градот. На одредени локации во центарот повторно ќе биде воведен и ноќен полициски час.

— реклама —

Меѓутоа, Управниот суд во Париз одлучи дека поворката меѓу плоштадот Бастилја и плоштадот Нација, во центарот на градот, сепак може да се одржи, објавија француските медиуми.

Министерот за внатрешни работи Лоран Нунез најави жалба на оваа одлука.

— реклама —

Нунез изјави дека на улиците ќе бидат распоредени голем број полицајци, повикувајќи се на ризиците за јавниот ред и опасноста од материјална штета врз продавниците.

— реклама —

Властите повторно очекуваат стотици илјади учесници на протестите. За време на минатиот викенд, против учесниците во нередите и ограбувачите биле распоредени 70.000 полицајци.

Младите во Франција веќе со недели протестираат барајќи подобри кадровски и материјални услови во училиштата.

Од средината на октомври, на протестите им се приклучиле и други групи граѓани, кои демонстрираат првенствено поради високите трошоци за живот.

По големите нереди што избувнаа на маргините на протестните собири на 17 октомври, полицијата минатата сабота главно успеала да спречи повторување на насилството.