Кризата со снабдувањето со гориво во Франција се продлабочува, а високите цени дополнително ги притискаат граѓаните и деловниот сектор. Според официјалните податоци, 11 отсто од бензинските пумпи во земјата се соочуваат со целосен или делумен недостиг на бензин или дизел.
Најпогоден е регионот Гранд Ест, каде што 16 отсто од бензинските пумпи пријавиле недостиг. Во Центр-Вал де Лоар и Окситанија, проблеми со снабдувањето имаат 14 отсто од операторите.
Состојбата се влошува од ден на ден. Уделот на погодените пумпи се зголемил од девет отсто во средата на 10 отсто во четвртокот, а во петокот достигнал 11 отсто на национално ниво.
Во исто време, цените продолжуваат да растат. Просечната цена на дизелот достигна 2,38 евра за литар, што е близу до претходниот рекорд од април. На речиси 70 бензински станици дизелот веќе се продава за повеќе од 2,70 евра за литар.
Поскапуваат и бензините. Литар SP95-E10 во просек чини 2,16 евра, SP95 достигнува 2,24 евра, а SP98 се продава за 2,25 евра.
Дополнителен притисок врз снабдувањето создаде затворањето на саудискиот нафтовод „Исток-Запад“, познат и како „Петролајн“. Нафтоводот има дневен капацитет од седум милиони барели и претставува копнена алтернатива за транспорт на нафта преку Ормускиот Теснец. Според наведениот извор, тој бил затворен по напади од територијата на Ирак.
Францускиот претседател Емануел Макрон изјави дека државата работи на обезбедување на нафтените резерви и ограничување на ценовниот притисок, оценувајќи дека сегашните цени за граѓаните се „неподносливи“.
Како одговор на кризата, француската влада ја продолжи финансиската поддршка за најпогодените професионални сектори до 31 декември 2026 година. Помошта за гориво за рибарите е зголемена на 35 центи по литар, а властите подготвуваат и дополнителни мерки за ранливите категории работници.
Посебен пакет мерки треба да стапи во сила на 1 октомври, а се разгледува и продолжување на помошта за граѓаните што патуваат на долги релации до своите работни места.
