Француските законодавци усвоија предлог-закон со кој се забранува користење социјални мрежи за деца помлади од 15 години, а истовремено се воведува и забрана за користење мобилни телефони во училиштата.
Законот, кој треба да добие зелено светло и од Уставниот совет, би можел да ја направи Франција првата земја членка на Европската Унија што ќе воведе ваква забрана, по примерот на Австралија, која слични мерки усвои во 2024 година.
Целта на новите правила е да се намалат штетните последици од користењето социјални мрежи врз здравјето и развојот на децата. Предвидени се и нови ограничувања за рекламирањето на социјалните платформи, како и задолжителна проверка на возраста на корисниците пред отворање профил.
Сè уште не е утврдено каков систем за проверка на возраста ќе мора да применуваат платформите, а конечната одлука се очекува да ја донесе францускиот регулатор за дигитални комуникации (ARCOM), кој ќе биде задолжен за спроведување на законот.
Францускиот претседател Емануел Макрон го поздрави усвојувањето на законот и побара тој да почне да се применува до почетокот на новата учебна година во септември. Тој претходно инсистираше парламентарната постапка да се спроведе по забрзана процедура.
Покрај Франција, и други европски држави размислуваат за слични ограничувања. Обединетото Кралство веќе воведе делумна проверка на возраста преку Законот за безбедност на интернет, Данска работи на сопствено законско решение, а во Канада неодамна беше предложена забрана за користење социјални мрежи за лица помлади од 16 години.
Сепак, експертите предупредуваат дека спроведувањето на ваквите мерки нема да биде едноставно. Истражувања спроведени во Австралија покажаа дека значителен број деца продолжиле да користат социјални мрежи и по воведувањето на забраната, главно поради недоволно ефикасните системи за проверка на возраста.
