Герасимовски: Центар доделува субвенции за велосипеди, е-велосипеди и дополнителна опрема, поттикнуваме здрави навики и еколошка мобилност

Општина Центар соопшти дека започнува со доделување субвенции за купување велосипеди, е-велосипеди и дополнителна опрема, со цел поттикнување на здрави навики и унапредување на еколошката мобилност во градот.

— реклама —

Градоначалникот Горан Герасимовски истакна дека мерката е насочена кон намалување на загадувањето и сообраќајниот метеж, нагласувајќи дека велосипедот претставува практично и здраво решение за секојдневно движење низ градот. Според него, ваквите активности придонесуваат и за подобрување на физичкото и менталното здравје на граѓаните, како и за почиста урбана средина, стои во соопштението.

— реклама —

Со мерката се субвенционира 30% од цената за купување велосипед или е-велосипед, најмногу до 3.000 денари, како и 30% од цената за дополнителна опрема, до 1.000 денари, стои во соопштението.

— реклама —

Право на субвенција има секој полнолетен жител на Општина Центар кој извршил купување почнувајќи од 21 март 2026 година. Јавниот повик започнува на 29 април 2026 година и ќе трае до исцрпување на средствата, најдоцна до 1 декември 2026 година, по принцип „прв дојден, прв услужен“, стои во соопштението.

— реклама —

Барањата со комплетна документација се поднесуваат во архивата на Општина Центар секој работен ден од 09:00 до 15:00 часот. Општината со оваа мерка продолжува со активности за одржлива мобилност и подобрување на квалитетот на секојдневниот живот на жителите, како што е наведено во соопштението.