Герасимовски: По „Киро Глигоров“, фотоволтаици и во училиштата „Коле Неделковски“ и „Гоце Делчев“

Општина Центар продолжува со реализација на својата стратегија за енергетска независност и одржлив развој, а по поставувањето на фотоволтаични системи во основното училиште „Киро Глигоров“, наскоро вакви системи ќе добијат и училиштата „Коле Неделковски“ и „Гоце Делчев“, ова го истакна градоначалникот на Општина Центар, Горан Герасимовски, на тркалезната маса „Зајакнување на конкурентноста“, во организација на Finance Think.

„Првите чекори кон енергетската транзиција во Општина Центар започнаа уште во 2023 година со формирањето на ТД ‘Енергија Центар’, првото општинско енергетско претпријатие во државата. Така ја започнавме нашата локална стратегија за енергетска независност и самоодржливост“, рече Герасимовски.

— реклама —

Тој нагласи дека стратегијата, која произлезе како одговор на енергетската криза, веќе дава конкретни резултати преку инвестиции во образовните установи и јавната инфраструктура.

— реклама —

Според него, за новите фотоволтаични системи во училиштата „Коле Неделковски“ и „Гоце Делчев“ веќе се обезбедени финансиски средства.

„Ефектите се многу реални – намалени трошоци за електрична енергија, поголема енергетска сигурност и поефикасно користење на јавните ресурси. Секој заштеден денар од енергијата се враќа назад во образованието, спортот, културата и услугите за граѓаните. Сакам Центар да биде препознаен како општина која не само што ги следи европските трендови, туку и ги поставува стандардите за другите локални самоуправи во државата“, истакна Герасимовски.

— реклама —

На настанот се обрати и управителот на ТД „Енергија Центар“, Игор Бимбилоски, кој посочи дека процесот на енергетска транзиција веќе носи видливи резултати, иако не изостануваат предизвиците.

„Најчесто тие се поврзани со административните процедури и координацијата со институциите, но тоа нè прави уште пофокусирани и поодлучни да продолжиме со реализацијата на проектите“, рече Бимбилоски.

Тој додаде дека „Енергија Центар“ претставува нов модел на локален развој, насочен кон поефикасно управување со енергијата и создавање поодржлива урбана средина за идните генерации.