Ги чувавме 350 илјади евра за да одиме на Геријатрија, ги печалевме од земјоделие - 50 години ставаме пари зад плочката, вели мајката на судијата Ѓоко Ристов која го брани синот

Донка Ристова, мајка на судијата Ѓоко Ристов, на денешното судење тврдеше дека парите пронајдени при претресот во семејната куќа во Неготино се нејзина и сопственост на нејзиниот сопруг Здраве. Според неа, станува збор за околу 350.000 евра, заштеда од повеќедецениска земјоделска работа, која ја чувале скриена зад плочка во ниша во куќата.

Одговарајќи на прашањата на обвинителката Искра Хаџи Василевска, Ристова рече дека првиот претрес бил извршен на 29 декември 2025 година, кога, според нејзиното сведочење, полицијата не пронашла ништо.

Вториот претрес бил извршен во јануари 2026 година, додека таа била на лекување. Раскажа дека не можела да присуствува, па нејзиниот помлад син го однел сопругот во куќата во Неготино. Според неа, при повтореното пребарување полицијата го пронашла местото на кое ги чувала парите.

„Тоа беше горе, во горната ниша, зад фрижидерот, зад работната маса. Плочката беше залепена на четири места за да не падне. Од 1975 година е направена и оттогаш, што ќе ми остане некое париче, таму си го ставав. Плочката се отвора како прозорче и таму си ги ставав паричињата во фолија. Ниту е ѕидано, ниту е кршено“, сведочеше Ристова.

— реклама —

Таа тврдеше дека на тоа место имало околу 350.000 евра, кои со сопругот ги чувале како обезбедување за староста.

„Тие ни беа гаранција за стари години, за тешки денови“, рече Ристова.

Во сведочењето наведе дека дел од парите биле во банкноти од 50 евра, а останатите во апоени од 200 и 500 евра. Според неа, заштедата ја создавале со продажба на земјоделски производи и со одгледување лозје.

— реклама —

„Тие парички се цел живот печалени. Ние сме земјоделска фамилија, произведувавме земјоделски производи. Секаде сум била, госпоѓо судијке, сме биле до Горни Милановац да ви кажувам ќе се чудите. Цела Македонија сме ја поминале додека да го оформиме лозјето, а потоа имавме голем добиток од лозјето, по 40 тони“, раскажа таа.

Ристова објасни дека парите што ги заработувале од продажбата на производите ги менувале во германски марки, а подоцна во евра. Потоа, за да зафаќаат помалку простор, ги заменувале за банкноти со поголема вредност.

„Ако продавам во Прилеп црвен пипер, веднаш ќе купам марки, тогаш беа марки, па евра. И за да не бидат помали пари, ги претворавме во поголеми евра, да не фаќаат место“, рече таа.

На прашањето кој знаел за скриената заштеда, Ристова одговори дека никој друг не знаел за парите, освен таа и сопругот.

— реклама —

Според нејзиното сведочење, последен пат ставала пари во скривницата пред околу четири години, односно во периодот 2023–2024 година, кога имала здравствени проблеми.

Обвинителката ја праша и зошто толкава сума не ја чувале во банка.

„Банката не гарантира повеќе. Цела банка ја затворија, луѓето се бесат. Службеници од банките си вадат пари од сметките на луѓето, нема никаква гаранција“, одговори Ристова, објаснувајќи ја својата недоверба кон банките.

— реклама —

Таа откри и за што планирала да ја искористи заштедата.

„Планот ми беше да платам 100.000 евра за кревет во Геријатрија. За три години ние двајца ќе ги изедеме тие пари“, рече Ристова.

За хартиените белешки пронајдени заедно со парите, објасни дека самата ги запишувала износите за да знае колку банкноти има во секое пакување.

Со ова сведочење, мајката на судијата Ѓоко Ристов пред судот тврдеше дека пронајдените пари не му припаѓаат на нејзиниот син, туку претставуваат семејна заштеда создадена од неа и нејзиниот сопруг. Потеклото и сопственоста на парите се прашања што треба да се оценуваат во судската постапка.