Градоначалникот на Општина Центар, Горан Герасимовски, ги повика граѓаните да се регистрираат и да го користат ГИС порталот – дигитална платформа преку која на едно место се достапни општинските услуги, информации и просторни податоци.
Според Герасимовски, порталот овозможува брз, едноставен и транспарентен пристап до актуелните информации, тековните и планираните инфраструктурни проекти, јавните повици, како и останатите активности на Општината.
„Со едноставна регистрација, секој граѓанин добива пристап до широк спектар на дигитални услуги и информации. Нашата цел е преку современи алатки да ја подобриме комуникацијата со граѓаните, да ја зголемиме транспарентноста и да овозможиме полесен пристап до општинските услуги“, изјави Герасимовски.
Преку порталот граѓаните можат да ги следат новостите и соопштенијата на Општината, да се информираат за културните настани, инфраструктурните зафати, како и да учествуваат во анкети, консултации и граѓански форуми.
Од Општина Центар посочуваат дека платформата постојано се надградува со нови функционалности. Меѓу најкористените е модулот за градинки, преку кој родителите имаат увид во активностите, присуството и известувањата поврзани со нивните деца.
Во рамки на ГИС порталот се достапни и информации за деталните урбанистички планови со можност за електронско барање извод од ДУП, 3Д приказ на општината преку Digital Twin, Зелен катастар, како и податоци за јавната инфраструктура, сообраќајната мрежа и други просторни информации.
Од Општината велат дека со развојот на ГИС порталот продолжуваат да градат модерна, транспарентна и ефикасна локална самоуправа, достапна за сите граѓани.
