Плановите за започнување со истражно бушење на нафта во Гренланд се одложени, откако тамошните власти оценија дека потребните регулаторни постапки не можат да завршат навреме. Станува збор за проект на американската компанија Greenland Energy, која има врски со луѓе блиски до администрацијата на Доналд Трамп.
Гренландската влада соопшти дека компанијата нема да може да ги добие потребните одобренија пред планираниот почеток на работите. Одлуката доаѓа само една недела пред најавениот старт на првите бушотини во областа Џејмсон Ленд.
Дополнителна причина за одложувањето е загриженоста на гренландските власти дека предвидениот рок не бил доволен за квалитетна процена на влијанието врз животната средина и локалната заедница.
Проектот предвидува истражување во заштитено мочуришно подрачје, кое е живеалиште на ретки видови птици и мошусни говеда, но и значаен простор за локалните ловци. Доколку бидат обезбедени сите потребни дозволи, бушењето би можело да започне најрано во зимата 2027 година.
Одложувањето е спротивно на претходните најави на Џеф Лендре, гувернерот на Луизијана и специјален пратеник на Трамп за Гренланд. По посетата на островот во мај, тој тврдеше дека производството на нафта би можело да започне за околу десет месеци.
Компанијата, пак, тврди дека под регионот Џејмсон Ленд се наоѓа нафта чија вредност би можела да достигне околу еден трилион долари. Извршниот директор Роберт Прајс порача дека Greenland Energy ќе ги почитува гренландските регулаторни процедури и ќе соработува со локалните власти.
Компанијата во јули предизвикала дополнителни реакции откако без потребното одобрение пренела опрема за бушење на гренландскиот брег. Властите тогаш ѝ упатиле остро предупредување.
Проектот привлече големо внимание и поради врските на Greenland Energy со луѓе од круговите околу Трамп. Во управниот одбор има лица поврзани со американскиот безбедносен сектор, додека милијардерот Кенет Грифин во април купил девет проценти од акциите на компанијата.
Дополнително, телевизискиот водител Фил Мекгроу, познат како Д-р Фил, склучил договор со компанијата за снимање документарна серија за проектот.
Плановите за бушење предизвикаа интерес и кај инвеститорите, кои очекуваа поддршката од администрацијата на Трамп да ја зголеми вредноста на компанијата. По објавувањето на одложувањето, акциите на Greenland Energy паднаа за повеќе од една третина.
Од компанијата и нејзиниот британски партнер 80 Mile, сепак, уверуваат дека остануваат посветени на проектот и дека периодот на одложување ќе го искористат за завршување на регулаторните постапки и доработка на плановите за истражување.
