Американската нафтена компанија „Гренланд Енерџи“ (Greenland Energy) најави дека планира да започне истражување за нафта на Гренланд, тврдејќи дека под површината на островот се наоѓаат милијарди барели сурова нафта. Сепак, проектот веќе предизвика спор со гренландските власти, кои тврдат дека компанијата нема важечки дозволи за такви активности.
Компанијата, со седиште во Тексас, планира да испрати околу 300 бродски контејнери со опрема за дупчење, но Министерството за минерални ресурси на Гренланд соопшти дека не постојат важечки дозволи ниту за истражување, ниту за подготвителни работи.
Овој случај дополнително ги засилува тензиите околу Гренланд, територија за која американскиот претседател Доналд Трамп повеќепати изјави дека треба да биде под контрола на САД.
Според „Гренланд Енерџи“, бродот со опремата треба да исплови во септември, а дупчењето да започне во октомври. Компанијата планира да вложи околу 60 милиони долари во проектот и тврди дека подрачјето Џејмсон Ленд крие резерви на нафта вредни трилион долари.
Гренландските власти потсетуваат дека уште во 2021 година престанаа да издаваат нови дозволи за истражување на нафта поради еколошките ризици. Дополнително, планираните бушотини се наоѓаат во заштитено подрачје опфатено со Рамсарската конвенција, каде што живеат бројни видови птици.
Министерот за минерални ресурси на Гренланд, Муте Б. Егеде, изјави дека проектот не може да продолжи без сите потребни одобренија и нагласи дека јавните тврдења на компанијата не ја одразуваат реалната состојба.
Во меѓувреме, американските бизнис-интереси на Гренланд продолжуваат да растат, а во проектот се вклучени и инвеститори блиски до Републиканската партија. Дел од нив се надеваат дека поддршката од администрацијата на Трамп дополнително ќе ја зголеми вредноста на компанијата и ќе го забрза реализирањето на проектот.
