Груевски фотографиран во ресторан во Унгарија, поранешен унгарски пратеник бара да му се одземе азилот

Поранешниот македонски премиер Никола Груевски бил фотографиран во ресторан во центарот на Будимпешта, тврди поранешниот унгарски пратеник Акош Хадхази, кој утрово објави дека фотографијата ја направил унгарски државјанин.

— реклама —

Груевски ја напушти Македонија во ноември 2018 година, пред да започне со издржување на двегодишната затворска казна во случајот „Тенк“. Оттогаш живее во Унгарија, каде што доби политички азил, а унгарските власти повеќепати одбија да го екстрадираат и покрај меѓународната потерница.

Тој беше осуден во отсуство во повеќе предмети поврзани со корупција, проневера и злоупотреба на службената положба и овластувањата.

— реклама —

Коментирајќи ја фотографијата, Хадхази изрази надеж дека унгарската влада едноставно заборавила на Груевски, додавајќи дека укинувањето на политичкиот азил би можело да овозможи негово враќање во Македонија и соочување со правдата.

— реклама —

Поранешниот пратеник во објавата оцени и дека политичките сојузници на Груевски сега се на власт во Македонија. Тој го спомена и унгарскиот бизнисмен Ласло Сиј, кој е вклучен во проект за изградба на автопат во земјава.