„Груевски ослободен од „Талир 2“ благодарение на Кривичниот законик што заедно го скроија СДСМ и ДПМНЕ“, велат од Левица

Левица преку соопштение оцени дека ослободителната пресуда за поранешниот премиер Никола Груевски во предметот „Талир 2“ е директна последица на измените на Кривичниот законик, кои во 2023 година беа изгласани со поддршка од СДСМ и ВМРО-ДПМНЕ.

— реклама —

Од партијата посочуваат дека со измените бил изменет членот 353 од Кривичниот законик, кој се однесува на злоупотреба на службената положба и овластување – кривично дело врз кое се темелело обвинението во случајот „Талир 2“. Според нив, примената на поблагиот закон довела до повторување на постапката и на крај до ослободителна пресуда.

— реклама —

Левица потсетува дека предметот се однесувал на изградбата на партиското седиште на ВМРО-ДПМНЕ – „Белата палата“, за кое во првостепената постапка Груевски беше осуден на шест години затвор, а беше наложена и конфискација на имотот.

Партијата наведува дека уште при носењето на измените предупредувала дека тие не претставуваат европска реформа, туку законски измени кои ќе овозможат заштита на политичари обвинети или осудени за кривични дела.

— реклама —

Според Левица, иако СДСМ и ВМРО-ДПМНЕ во јавноста се претставуваат како политички противници, при носењето на измените на Кривичниот законик постигнале согласност кога станува збор за прашања што ги засегаат високите функционери.

— реклама —

Од партијата сметаат дека ослободителната пресуда за Груевски е резултат на политички договор постигнат во Собранието во 2023 година и предупредуваат дека истиот механизам во иднина може да биде применет и во други случаи што се однесуваат на актуелни или поранешни функционери.