Гувернерот Славески до студентите практиканти: „Вие сте дел од иднината на централното банкарство“

Гувернерот на Народната банка, Трајко Славески, ги пречека студентите кои започнуваат со практична работа во институцијата, посакувајќи им успешен почеток и можност да стекнат нови знаења и практични искуства.

— реклама —

Средбата се одржа во Музејот на Народната банка, во година кога институцијата одбележува 80 години централно банкарство – јубилеј што, како што беше истакнато, го симболизира долгогодишниот придонес во одржувањето на макроекономската стабилност и довербата во националната валута.

— реклама —

„Вие сте дел од иднината. Искористете ја практикантската работа најдобро што можете – поставувајте прашања, учете од вашите ментори и бидете отворени за нови идеи“, им порача Славески на студентите.

— реклама —

Во текот на практикантската програма, студентите ќе се запознаат со работата на повеќе организациски единици во Народната банка, меѓу кои монетарната политика и истражувањето, финансиските пазари, статистиката, информатичката технологија, правните работи и трезорското работење.

Од Народната банка посочуваат дека преку програмата студентите ќе добијат практичен увид во функционирањето на современа централна банка и ќе стекнат искуство во различни области од нејзиното работење.