Француското Министерство за финансии потврди дека при сајбер-напад врз системот на Даночната управа биле украдени податоци на физички и правни лица.
Министерството соопшти дека напаѓачот во средата објавил дека кон крајот на јуни успеал да пристапи до системот на Даночната управа. По спроведената истрага било потврдено дека навистина дошло до неовластен пристап, како и до прегледување и кражба на податоци.
Во тек се дополнителни проверки за да се утврди кои информации биле компромитирани и колку даночни обврзници се засегнати. Француските власти најавија дека дополнителни информации ќе објават веднаш штом бидат достапни.
„Сите корисници чии податоци се компромитирани ќе добијат лично известување со детали за информациите до кои потенцијално било пристапено или кои биле украдени, како и упатства за мерките на претпазливост што треба да ги преземат“, соопшти Министерството.
Платформата FrenchBreaches, која следи сајбер-напади во Франција, објави дека можеби биле украдени податоци на речиси 700.000 даночни обврзници. Според платформата, информацијата ја добиле директно од хакерите кои ја презеле одговорноста за нападот.
