ЛОНДОН

Предупредување до Европа: Иран распоредува ракети за да го погоди Лондон

Иран ги позиционира своите ракети за да го погодат Лондон, објави британскиот национален весник „Тајмс“, повикувајќи се на израелски разузнавачки и дипломатски извори. Причина за тврдењето се двете ракети испукани кон британската воена база во Диего Гарсија, која е на приближно исто растојание од Техеран како и западноевропските главни градови.„Иранскиот терористички режим претставува глобална закана. Со ракети способни да стигнат до Лондон, Париз или Берлин“, соопшти израелската војска.Изворите на британското издание тврдат дека двете ракети биле предупредувачки сигнал за Европа.Според еден дипломат, целта на Иран била да ги предупреди Велика Британија и европските сојузници, кои ги поддржуваат САД и Израел во обезбедувањето на Ормутскиот теснец. Изворот додаде дека веројатно претходно не било познато дека ракетата се наоѓа во арсеналот на Иран.„Доколку ракетата биде лансирана од северен Иран, нејзиниот дострел би можел да достигне низ цела Европа“, предупреди тој.Се верува дека ракетите се лансирани со најдолг дострел досега. Израелските одбранбени сили потврдија дека ракетата успеала да помине околу 4.000 км.Не е со сигурност познато дали ракетите стигнале до Диего Гарсија. Првата ракета била пресретната од американски брод, а втората паднала откако прелетала околу 3.200 км, приближно 640 км од американско-британската база на островите Чагос.Како одговор, иранскиот министер за надворешни работи, Абас Арагчи, изјави дека британскиот премиер Кир Стармер „ги става во опасност британските животи“.

Свет | пред 1 седмица

(Видео) Антисемитски напад во Лондон: запалени возила на еврејска итна помош

Полицијата во Лондон спроведува истрага откако четири возила на еврејска служба за итна медицинска помош биле запалени во Голдерс Грин.Британската полиција рано утрово соопшти дека истражува подметнување пожар на четири возила на еврејска служба за итна помош во Лондон, наведувајќи дека инцидентот се третира како антисемитско злосторство од омраза.Полицијата била повикана во Голдерс Грин, кварт во Лондон, поради подметнат пожар и оштетувања на четири амбулантни возила кои ѝ припаѓаат на организацијата „Хацола Нортвест“, еврејска волонтерска група што обезбедува итна медицинска помош, пренесува АП.Пожарот предизвикал повеќе детонации на возилата, поради што биле искршени прозорците на блиска станбена зграда, се наведува во соопштението на лондонската противпожарна служба, која додава дека нема повредени, пожарот е ставен под контрола и истрагата е во тек.„Свесни сме дека овој инцидент ќе предизвика голема загриженост во заедницата и затоа полициските службеници остануваат на местото за да ја спроведат истрагата“, изјави началничката на лондонската полиција Сара Џексон, додавајќи дека засега нема уапсени осомничени.Полицијата потврди дека извештаите за експлозии се поврзани со гасни канистри во амбулантните возила, поради што биле евакуирани блиските станбени објекти.Според податоците на Фондот за безбедност на заедницата, кој работи на заштита на еврејската заедница во Лондон, бројот на антисемитски инциденти пријавени низ Велика Британија значително се зголемил од почетокот на војната меѓу Израел и Хамас во Појасот Газа кон крајот на 2023 година. Во 2025 година биле евидентирани 3.700 антисемитски инциденти, наспроти 1.662 во 2022 година.

Свет | пред 1 седмица

Британска нуклеарна подморница во близина на Ормут: Лондон го засилува военото присуство

Британската нуклеарна подморница „ХМС Ансон“ пристигнала во Арапското Море, во близина на Ормутскиот теснец, во момент кога растат тензиите и најавите за можна ескалација на воените операции против Иран.Според британските медиуми, подморницата испловила од австралискиот град Перт на 6 март и се позиционира во северниот дел на Арапското Море – стратешка зона блиску до клучниот енергетски коридор низ кој поминува значителен дел од светската нафта.„ХМС Ансон“ е опремена со крстосувачки ракети „Томахавк Блок IV“ со дострел до 1.600 километри, како и со тешки торпеда „Спирфиш“, што ѝ дава капацитет за прецизни удари на копнени цели и поморски операции.Распоредувањето на подморницата доаѓа во чувствителен момент, кога Велика Британија веќе ѝ даде зелено светло на САД да ги користат британските воени бази за напади врз ирански цели.Овој потег дополнително ја зајакнува воената позиција на Западот во регионот и испраќа јасен сигнал за подготвеност за проширување на операциите, особено во контекст на заканите околу Ормутскиот теснец и енергетската безбедност.Во услови на веќе зголемена нестабилност, присуството на нуклеарна подморница во оваа зона ја подигнува влогот на конфликтот и ја засилува загриженоста за можна поширока регионална ескалација.

Свет | пред 1 седмица

Бебе фрлено од прозор во Лондон, мајката обвинета за убиство

Бебе старо само 18 дена починало од тешка повреда на главата откако, според наводите на обвинителството, мајката го фрлила од прозорец на стан на трети кат во Лондон. Девојчето Мариам паднало од висина од околу десет метри додека нејзиниот татко во кујната подготвувал млеко, било кажано на суд, пренесува Скај њуз.За убиството е обвинета 43-годишната Захира Бјауане, која требало да се појави пред судот Олд Бејли, но не присуствувала на рочиштето. Трагедијата се случила во саботата во семејниот стан во Вестминстер.Според обвинителството, таткото бил во кујната и подготвувал адаптирано млеко кога мајката наводно го фрлила новороденчето низ лизгачки прозорец. Обвинителот Филип Мекги изјавил дека таткото веднаш истрчал надвор, но не успеал да стигне до детето, по што се вратил во станот и во 7:30 часот повикал итна помош.Екипите пристигнале за неколку минути и го пронашле девојчето на бетонска површина меѓу зградата и метална ограда. Било пренесено во болница во критична состојба, каде починало околу 9 часот. Констатиран бил прелом на черепот. Полицијата при влегувањето во станот ја затекнала мајката како седи на кревет. Првично била уапсена под сомнение за обид за убиство, а следниот ден обвинението било преквалификувано во убиство.Судијата Марк Лукрафт ѝ одредил притвор. Рочиштето за изјаснување по обвинението е закажано за 3 јуни, додека судењето треба да започне на 15 февруари следната година и да трае десет дена.

Свет | пред 1 седмица

Иран му се закани на Лондон: Бидете многу внимателни со вклучување во војната

Иранскиот амбасадор во Лондон, Сејед Али Мусави, ја предупреди Велика Британија да биде „многу внимателна“ со евентуално подлабоко вклучување во војната, истакнувајќи дека Техеран ќе има право на самоодбрана доколку британските сили директно се приклучат на американско-израелските напади.Во интервју за Би-Би-Си, Мусави изјави дека Иран очекува британската влада, како и другите западни влади, да постапуваат „многу внимателно и претпазливо“ во сегашната ескалација на конфликтот.Велика Британија им дозволи на Соединетите Американски Држави да користат британски воени бази за, како што велат британските министри, одбранбени удари врз ирански цели, но официјално не се приклучи директно на нападите. Иранскиот амбасадор оцени дека е „добро“ што Лондон не е директно вклучен во конфликтот, додавајќи дека британската влада, според него, извлекла поука од инвазијата врз Ирак во 2003 година.Сепак, Мусави нагласи дека секоја база што ќе се користи за напади врз Иран ќе се смета за легитимна цел.„Доколку објекти, имот или бази се користат против иранскиот народ, тие ќе се сметаат за легитимни цели“, изјави тој.На прашањето дали Иран ќе ги прекине нападите врз воени бази надвор од Израел, Мусави одговори дека тоа ќе зависи од потезите на САД и Израел.„Ако агресијата продолжи, нема сомнеж дека ќе се браниме. Ако тие сакаат да ги користат тие воени бази, иако ние тоа не го сакаме, нема сомнеж дека ќе се браниме во согласност со тоа“, рече иранскиот амбасадор.Конфликтот влезе во втората недела откако САД и Израел извршија напади врз цели во Иран, по што Техеран возврати со удари на повеќе локации во регионот, меѓу кои и во Кувајт, Обединетите Арапски Емирати, Саудиска Арабија, Бахреин, Оман и Ирак, како и во близина на британска воздушна база на Кипар. И покрај извинувањето што иранскиот претседател Масуд Пезешкијан го упати до соседните земји во Персискиот Залив, иранските власти најавуваат дека нападите врз американските воени бази ќе продолжат сè додека траат нападите врз Иран.

Свет | пред 3 седмици

Оштетен споменикот на Черчил во Лондон, одговорност презеде холандска пропалестинска група

Триесет и осумгодишен маж е уапсен откако со графити го оштетил споменикот на Винстон Черчил на плоштадот Парламент во центарот на Лондон, при што поранешниот британски премиер бил означен како „ционистички воен злосторник“. Метрополитен полицијата соопшти дека осомничениот бил приведен утрово под сомнение за расно мотивирано кривично дело предизвикување штета.На бронзената скулптура биле испишани и пораки како „Запрете го геноцидот“ и „Ослободете ја Палестина“, како и слоганите „Никогаш повеќе е сега“ и „Глобализирајте ја интифадата“, испишани со црвена боја. Според полицијата, мажот бил забележан околу 4 часот наутро како пишува графити, а првите полицајци пристигнале на местото за помалку од две минути, по што бил уапсен.Одговорноста за акцијата ја презеде холандската група „Free the Filton 24“, која на социјалните мрежи објави видео од лицето облечено во црвен комбинезон со натпис „Поддржувам палестинска акција“. Групата се претставува како здружение на семејства и пријатели на 24 активисти обвинети за упад во објект на израелската одбранбена компанија Elbit Systems во Велика Британија во 2024 година.Активистот Олакс Аутис, кој тврди дека тој е лицето од снимката, изјави дека го оштетил споменикот за да го сврти вниманието кон, како што наведе, сериозни прекршувања на човековите права. Во својата изјава додаде дека Черчил, според него, претставува симбол на политичка корупција и ја критикуваше актуелната британска влада, предводена од премиерот Кир Стармер.Од кабинетот на премиерот го осудија инцидентот, оценувајќи го како „срамен и одвратен чин“, нагласувајќи дека сторителот мора да одговара за делото. Лондонските власти соопштија дека споменикот бил ограден и веднаш започнало неговото чистење.Ова не е првпат споменикот на Черчил да биде цел на вандализам. За време на протестите на движењето Black Lives Matter во 2020 година, на него беше испишан натпис дека е „расист“, а подоцна истата година активист од климатското движење беше казнет поради сличен инцидент.Споменикот висок 3,6 метри, изработен од скулпторот Ајвор Робертс-Џонс, е откриен во 1973 година и е еден од дванаесетте споменици на плоштадот Парламент, каде се наоѓаат и статуи на значајни светски државници, меѓу кои Абрахам Линколн и Нелсон Мандела.

Свет | пред 1 месец

(Видео) Вирална снимка од Ричмонд: Маскирани крадци ограбиле златара пред очите на минувачите

Снимка од дрска кражба во Лондон, во населбата Ричмонд, за кусо време стана вирална на социјалните мрежи и предизвика бурни реакции во јавноста. Двајца маскирани мажи, во саботата претпладне, пред очите на шокирани минувачи, со чекан го скршиле излогот на семејна златара и однеле вреден накит.Инцидентот се случил околу 10:30 часот, а на видеото јасно се гледа како еден од напаѓачите, со фантомка на лицето и голем чекан во рацете, ѝ приоѓа на златарата „Gregory & Co“, додека неговиот соучесник стои на готовс со подготвена торба. За неколку секунди улицата одекнувала од силни удари, додека напаѓачот без двоумење удирал по излогот.Иако ламинираното безбедносно стакло кратко време пружило отпор, крадецот упорно ги насочувал ударите во една точка сè додека стаклото не попуштило. Во тој момент, неговиот соучесник се нафрлил кон излогот и со голема брзина почнал да го собира накитот, ставајќи го во сина торба, по што двајцата избегале од местото на настанот.Повеќето сведоци останале вчудовидени и не реагирале, додека најмалку едно лице прибрано го снимало целиот настан со мобилен телефон. Еден очевидец за британските медиуми изјавил дека напаѓачите „се појавиле од никаде, со чекан и торба, и веднаш почнале да го кршат прозорецот“, додавајќи дека сè се случило толку брзо што никој немал време да реагира.Полицијата во Лондон соопшти дека е започната истрага и дека се анализираат снимките од надзорните камери и видеата објавени на социјалните мрежи, со цел да се идентификуваат сторителите на кражбата.

Свет | пред 1 месец

Преку Grindr намамувале жртви и ги ограбувале во нивните домови: двајца мажи осудени на затвор во Лондон

Двајца мажи кои преку апликацијата за запознавање Grindr намамувале жртви во нивните домови со цел да ги ограбат, се осудени на затворски казни во Велика Британија. Рахмат Кан Мохамади (23) и Мохамед Билал Хотак (27) користеле разработена и однапред испланирана метода за кражба на мобилни телефони и банкарски податоци од своите жртви низ Лондон, објави Sky News.Според обвинението, двајцата, кои се бегалци од Авганистан, преку Grindr договарале средби со жртвите, а откако ќе влезеле во нивниот дом, барале да пуштат музика на YouTube. На тој начин обезбедувале телефонот да остане отклучен. Потоа, користеле различни начини за одвлекување на вниманието – барале жртвата да се истушира, да подготви пијалак или прашувале каде е тоалетот – со цел таа да ја напушти просторијата. Во тој момент го земале телефонот и заминувале.По кражбата, уредите биле користени за онлајн и бесконтактни плаќања, а во одредени случаи и за префрлање пари на нивни лични сметки. Мохамади на ваков начин ограбил 11 жртви во периодот од октомври 2024 до март 2025 година, додека Хотак учествувал во нападите меѓу октомври и декември 2024 година.На Крунскиот суд во Isleworth, Мохамади беше осуден на пет години затвор, а Хотак на три и пол години. Судјката Аденике Балогуњ при изрекувањето на пресудата истакна дека ги земала предвид психолошката траума и вознемиреноста што жртвите ги претрпеле откако ги пуштиле обвинетите во својот дом. „Ги поканиле во својот приватен простор, а за возврат биле злоупотребени“, нагласи таа.Обвинителството тврдеше дека станува збор за злосторства од омраза, бидејќи жртвите биле целени поради нивната сексуална ориентација. Сепак, судјката оцени дека жртвите биле избрани поради нивната перципирана ранливост, а не поради непријателство кон нивната сексуалност. Таа додаде дека Grindr претставувал лесен начин за пристап до домовите на жртвите и дека постои сомнеж оти обвинетите сметале дека дел од жртвите нема да го пријават кривичното дело.За време на судењето беа изнесени и потресни сведоштва. Една од жртвите раскажа дека претрпела тешка психолошка траума, особено поради губењето на фотографии од починати членови на семејството, кои биле зачувани на украдениот телефон. Друга жртва опиша како била одведена во мрачен парк доцна навечер и понижувана пред да ѝ биде одземен телефонот, по што изјавила дека и денес се плаши да запознава луѓе преку интернет.Поротата го прогласи Мохамади за виновен по 10 точки за провала, девет за измама со лажно претставување и една за кражба, додека Хотак беше осуден по пет точки за провала, пет за измама и една за кражба. Надзорникот Овен Реновден од Метрополитен полиција ги опиша нивните дела како бездушни, пресметани и однапред планирани, нагласувајќи дека последиците врз жртвите биле разорни и долготрајни.

Свет | пред 3 месеци

(Видео) Инцидент во лет на Ryanair: Пијан маж се обиде да отвори врати на авион

Британец може да биде осуден на пет години затвор откако се обидел да ги отвори вратите на преполн авион на компанијата Ryanair за време на лет. Авион кој летал од Лондон (Лутон) кон Аликанте во јужна Шпанија, морал принудно да слета во Тулуз, Франција, откако пијан маж започнал да се заканува и предизвикувал хаос.Според одредени извори, обвинетиот бил лидер на група пијани мажи кои минатата недела биле симнати од лет од страна на специјалните полициски сили. Стоел покрај вратата за итни случаи и се обидувал да ја отвори. Пилотот немал друга опција освен принудно слетување,“ изјавил еден од патниците за Daily Mail.Нивото на алкохол во крвта на обвинетиот било толку високо што неколку часа не можеле да разговараат со него. Четворица од неговите пријатели исто така биле уапсени.На снимка објавена на TikTok се гледа апсењето на групата. Еден од патниците раскажал:Двајца непристојни мажи започнаа тепачка, ги игнорираа предупредувањата и одбиваа да седнат. Тие дури не требаше да се качат на авион бидејќи беа толку пијани.Инцидентот ескалирал кога полицијата се обидела да ја смири ситуацијата. Синот на обвинетиот молел за помош и викал:Тоа е мојот татко!“ додека полицајците го извлекувале неговиот татко од седиштето.Според сведоците, групата била бучна и непристојна и пред полетувањето, менувале седишта, игнорирале безбедносни протоколи и на еден од патниците се обиделе да му се доближат со физички контакт.Авионскиот екипаж и другите патници се обидувале да ја смирaт ситуацијата, а неколку родители ги замолиле да не користат непристојни зборови поради присуството на деца. Меѓутоа, хаосот продолжил, па пилотот одлучил за принудно слетување. По слетувањето, единица на воздушната полиција го уапсила обвинетиот и го извела од авионот.

Свет | пред 6 месеци

Осум години затвор за негувателка која тепала и малтретирала бебиња во градинка во Лондон

Воспитувачката Роксана Лецка (22) е осудена на осум години затвор поради „садистичко“ малтертирање на 21 бебе во градинки во западен Лондон. Таа е прогласена за виновна за повеќекратно тепање, штипење и туркање на деца, а во еден од инцидентите удрила дете со нога по лицето и му застанала на рамото.Лецка призна вина за седум точки од обвинението за суровост кон лице помладо од 16 години, а судот во Кингстон во јуни ја прогласи виновна и за уште 14 точки, пренесе „Гардијан“.Според видео-снимките, во два различни објекти во Лондон таа ги малтретирала децата, предизвикувајќи кај нив страв и плачење. Снимките покажуваат како ги штипела, ги гребела и ги туркала, а во еден случај неколкупати удрила момче по лицето и грубо го нагазила.Во изјави до полицијата, Лецка признала дека консумирала канабис пред да дојде на работа, а во еден момент е снимена како пуши електронска цигара во близина на едно бебе. Лондонската полиција соопшти дека злоставувањата се случувале во два градинки помеѓу октомври 2023 и јуни 2024 година.Лецка била вработена во градинката „Риверсајд“ од јануари до јуни 2024 година. Неколку родители уште во март и мај истата година пријавиле дека нивните деца се враќале дома со необични повреди и модринки.

Свет | пред 6 месеци

Царина заплени играчки вредни милиони фунти: Децата се изложени на ризик

Британските царински служби запленија фалсификувани играчки во вредност од над 3,5 милиони фунти, соопшти Канцеларијата за интелектуална сопственост (IPO).Од вкупно 259.000 запленети производи, дури 90 проценти биле копии на кинеските кукли „Лабубу“, кои годинава станаа глобален хит преку социјалните мрежи.Тестирањата на безбедноста покажале дека три од четири фалсификати не ги исполнуваат основните стандарди, а меѓу ризиците се задушување, присуство на токсични хемикалии и неисправни делови.Зад привлечното пакување често се кријат сериозни опасности за децата, предупреди Хелен Барнхам, заменичка директорка за спроведување закони при IPO.Овој месец, во две продавници во западен Лондон, беа пронајдени 100 лажни кукли „Лабубу“, кои биле оценети како потенцијално смртоносни поради делови што можат да предизвикаат задушување.Истражувањата покажуваат дека 92 проценти од купувачите знаат дека постојат фалсификувани играчки, но седум од десет родители признаваат дека цената им е поважна од безбедноста, додека само 27 проценти како приоритет ја наведуваат сигурноста на децата.

Свет | пред 6 месеци

Инцидент во Фиренца: 20 патници исфрлени од авион поради вишок тежина

Дваесет патници морале да го напуштат авионот на British Airways кој требал да лета од Фиренца за Лондон, бидејќи леталото било претешко за полетување поради екстремната горештина. Настанот се случил на 11 август на аеродромот „Америго Веспучи“ во Фиренца, пишува Mirror.Според објаснувањето на пилотите, високата температура (околу 35 степени) предизвикала поредок воздух, што барало поголема количина гориво за моторите да работат ефикасно. Дополнителното гориво ја зголемило вкупната тежина, надминувајќи ги безбедносните граници за полетување. Ситуацијата била дополнително комплицирана од кратката писта на аеродромот во Фиренца, која е речиси двојно пократка од онаа на лондонскиот „Гетуик“.Една од патничките изјавила дека персоналот прво најавил дека ќе мора да бидат симнати 36 патници, но на крај бројката била околу 20. British Airways се извинил за непријатноста, објаснувајќи дека „поради екстремните температури и специфичните услови на аеродромот мора да се намали тежината на леталото“.Авио-експертот Џони Вилијамс од Универзитетот во Рединг предупреди дека ваквите случаи ќе станат сè почести поради климатските промени:„Услови какви што порано се случуваа еден ден во текот на летото, до 2060-тите може да се случуваат и по неколку дена во неделата. Летовите за Шпанија, Италија или Грција би можеле да станат поскапи бидејќи авиокомпаниите ќе превезуваат помалку патници.“Овој инцидент доаѓа по друг скандал на лет на British Airways, кога една патничка, наречена „најлошата патничка од пеколот“, предизвика хаос во авион – поврати врз семејство, ги плукала со вино и ја нападнала жена за коса, по што морала да биде смирена од екипажот.

Свет | пред 7 месеци

Камион се удри во Боинг на лондонскиот Хитроу, возачот ги измеша сопирачката и гаста

Камион се удри во Боинг 787-9 на „Сауди Арабиан ерлајнс“ на аеродромот Хитроу пред три дена околу 14:54 часот, правејќи дупка во авионот и предизвикувајќи долги одложувања, објавува „Мирор“.Возачот ја изгубил контролата врз камионот, кој се удри во авионот на земја откако ги помешал гасот со сопирачката. Ова се случило само неколку минути откако патниците на летот SVA105 од Меѓународниот аеродром „Крал Абдулазиз“ во Џеда, Саудиска Арабија, се истоварија на Терминал 4 на лондонскиот аеродром.Ракувачите со багаж на местото на настанот опишаа што се случило.„Возачот веројатно се обидувал да изврши протокол за безбедносен маневар каде што мора да ги активира сопирачките неколку пати додека се приближува кон авионот“, велат тие.Тие имаат протокол каде што мораат целосно да застанат неколку пати додека се приближуваат кон авионот. Мислам дека го помешал педалот за гас со сопирачката и се удрил во авионот. Со оглед на тоа што трупот бил дупнат, пристигнале противпожарната служба и полицијата.„Тој авион нема да може да лета долго време бидејќи мора да се замени и, се разбира, мора да се затвори дупката за да лета“, објасни персоналот. Следниот лет од Хитроу до Џеда беше откажан, а патниците на оригиналниот лет мораа да чекаат кај местото за подигање багаж.

Свет | пред 9 месеци

Денеска во Лондон ќе се потпише стратешкиот договор Македонија-Велика Британија

Денеска во Лондон треба да биде потпишан договорот за стратешко партнерство меѓу Македонија и Велика Британија.Договорот ќе го потпишаат македонскиот министер за транспорт Александар Николовски и британскиот министер за услуги, мали бизниси и извоз во министерството за бизнис и трговија, Герет Томас.Николовски изјави дека парите кои и се ставаат на Македонија на располагање ќе се користат за проектно финансирање. Премиерот Мицкоски пак порача дека секој потрошен цент ќе биде транспарентен.

Македонија | пред 10 месеци

Напад во Лондон, пет лица се избодени, полицијата го бара сторителот

Полицијата бара сторител, откако пет лица беа избодени на забава во југоисточен Лондон, објавија британските медиуми.Полицијата беше повикана на местото на нападот на улицата Натан Веј во Темзмид, југоисточен Лондон, во раните утрински часови.Пет лица беа избодени и се во болница каде што добиваат третман за повредите.Портпаролот на Метрополитенската полиција изјави: „Полицијата истражува инцидент во Темзмид утрово, каде што пет лица беа нападнати. Полицијата беше повикана на улицата Натан Веј во 4:19 часот наутро во сабота, 17 мај, по пријавите за повеќе лица повредени на настанот.“„Полицијата пристигна на местото на настанот со амбулантно возило и пет лица беа пронајдени со убодни рани. Тие беа однесени во болница каде што се проценуваат нивните повреди. Истрагата е во тек и полицијата ќе остане на местото на настанот во текот на целиот ден. Досега нема апсења“, рече портпаролот.Портпаролот на Лондонската служба за брза помош додаде: „Бевме повикани во 4:17 часот наутро во сабота, 16 мај, поради пријави за убод со нож во улицата Натан Веј. На местото на настанот, им пруживме прва помош на тројца пациенти пред да бидат однесени во болница.“Маж кој работи во двор за рециклирање недалеку од местото на инцидентот се огласи на социјалните мрежи и рече дека „неколку лица се избодени со нож“.Тој објави на Фејсбук: „Дворот ќе биде затворен денес. Преку ноќ, неколку лица беа избодени со нож, а потоа полицијата го затвори патот во двата правци.“

Свет | пред 10 месеци

Затворена американска амбасада во Лондон: Пронајден сомнителен пакет

Американската амбасада во Лондон влезе во состојба на блокада, со воспоставување на поширок периметар околу зградата поради безбедносна закана, изјавија за Џерусалим пост извори запознаени со ситуацијата.Британската полиција подоцна појасни дека полицајците биле ангажирани во истрага на сомнителен пакет во областа Nine Elms во јужен Лондон и дека блокадите на патиштата биле поставени како мерка на претпазливост. „Свесни сме за шпекулациите на интернет во врска со инцидентот во близина на американската амбасада во Нин Елмс“, соопшти лондонската Метрополитен полиција на социјалната мрежа Х.„Блокади се поставени во областа како мерка на претпазливост додека полицајците го истражуваат сомнителниот пакет. Дополнителни информации ќе споделиме во наредниот период“. Американската амбасада на мрежата X соопшти дека полицијата го затворила патот во близина на зградата „од изобилство на претпазливост“.

Свет | пред 1 година

(Видео) Пожар избувна во станбена зграда, 70 пожарникари на терен, жителите евакуирани: драма во Лондон

Пожар избувна во станбена зграда во источен Лондон, а околу 30 луѓе се евакуирани. Десет противпожарни возила и околу 70 пожарникари одговорија на пожарот на Квинс Роуд Вест. Лондонската противпожарна бригада соопшти дека сообраќајот во областа ќе биде отежнат додека екипите работат на гаснење на пожарот, кој избувна во стан на 10-тиот кат од 15-катната зграда. „Тројца мажи го напуштија станот пред пристигнувањето на бригадата, а медицинскиот персонал на лондонската Брза помош им помага на местото на настанот. Околу 30 лица се евакуирани од околните станови“, соопшти Лондонската противпожарна бригада.Тие најавија и покренување истрага за утврдување на причината за пожарот, пренесува Скај Њуз.

Свет | пред 1 година

Нема фотографија

Терор на улиците на Лондон: Два напади со самострел за 10 дена, полицијата трага по маж кој го тероризира градот

Во Лондон во рок од 10 дена се случија два напади со самострел, а полицијата верува дека случаите се поврзани и дека напаѓачот е истиот.Најпрво една жена (44) била застрелана со стрела во главата додека поминувала улица во Шоредич вечерта на 4 март.Потоа, на 14 март, маж (20) бил погоден во вратот од стрела во близина на улицата Арнолд Циркус, 60 метри од местото каде што се случил првиот напад, исто така во вечерните часови, објави Скај њуз.Двете жртви ја напуштиле болницата и не се верува дека имаат долгорочни здравствени ефекти, соопшти полицијата. Полицијата работи на пронаоѓање на сторителот, а повеќе полицајци во текот на викендот ќе бидат испратени во областа за подобра заштита.

Свет | пред 2 години

Нема фотографија

Паника во Лондон, автомобил влетал во капијата на Бакингемската палата: Вооружени полицајци се упатиле на местото на настанот

Непознат маж рано утринава со својот автомобил удрил во портите на Бакингемската палата во Лондон.Вооружена полиција веднаш пристигнала на местото на настанот извикувајќи „држи ги рацете на глава“, бидејќи возачот бил уапсен.Вооружени полицајци биле забележани околу возачот кој клекнал надвор од возилото. Полицијата потврди дека маж е уапсен под сомнение дека ја оштетил Бакингемската палата.Сведок на инцидентот, кој сакаше да остане анонимен, рече дека ја гледал сцената околу 2.30 часот откако слушнал „силен тресок“.„Слушнав силен тресок, погледнав и автомобилот удри во Бакингемската палата“, рече тој.Истрагата е во тек.

Свет | пред 2 години

Пожар во зграда во Лондон: Пожар избувна во луксузен кварт, 11 повредени, повеќе од 100 луѓе евакуирани

Единаесет лица се пренесени во болница откако избувна пожар во зграда во луксузната лондонска населба Саут Кенсингтон, во југозападен Лондон, во близина на Природонаучниот музеј.Лондонската противпожарна бригада на мрежата Х извести дека 11 лица биле третирани поради вдишување чад и дека околу 130 жители морале да бидат евакуирани од зградата каде што избувнал пожарот и од соседните згради.На местото на настанот пристигнале 15 противпожарни возила и околу 100 пожарникари, јавува Би-Би-Си.Околу 15 луѓе успеале да побегнат од зградата зафатена во пожар пред да пристигнат пожарникарските екипи, јавува Sky News.Еден од пожарникарите изјавил дека пожарот се проширил од приземјето кон горниот кат и покривот. Причината за пожарот засега не е позната.

Свет | пред 2 години