Инстант плаќања и побрзи трансакции: Македонија го модернизира финансискиот систем со поддршка од Светската банка

Македонија планира да воведе национален систем за инстант плаќања, кој во иднина ќе биде поврзан со соодветните платни системи во Западен Балкан и Европската Унија. Проектот ќе се реализира со поддршка од Светската банка, а целта е да се забрзаат трансакциите и да се олесни финансиското поврзување на граѓаните и компаниите со регионалните и европските пазари.

За проектот, како и за натамошната модернизација на платната инфраструктура, разговарале гувернерот на Народната банка, Трајко Славески, заменик-претседателката на Светската банка, Антонела Басани, и извршниот директор на институцијата за конституенцата во која членува Македонија, Јуџин Ругенат.

— реклама —

Средбите се одржале во рамките на Годишните средби на Меѓународниот монетарен фонд и Групацијата на Светската банка. Меѓу главните теми биле дигитализацијата на плаќањата, усогласувањето на домашната регулатива со европските стандарди и интегрирањето на македонскиот финансиски систем во европската платежна инфраструктура.

Еден од приоритетните проекти на Народната банка е воспоставување национална платформа за инстант плаќања, според моделот на европскиот систем ТИПС, кој функционира во рамките на Европската централна банка. Системот треба најпрво да овозможи побрзи и поефикасни плаќања во земјава, а во следната фаза да поддржи и инстант прекугранични трансакции.

— реклама —

По воспоставувањето на домашниот систем, планирано е негово поврзување со платните системи во земјите од Западен Балкан, со крајна цел: интеграција во поширокиот европски платежен простор.

— реклама —

На разговорите Славески се осврнал и на придобивките од приклучувањето на Македонија кон Единствената област за плаќања во евра (СЕПА). Според него, една година по приклучувањето, СЕПА веќе е водечки канал за прекугранични плаќања во евра, со позитивни ефекти за граѓаните, компаниите и економијата.

Претставниците на Светската банка ја потврдиле поддршката за продолжување на реформите во платежниот сектор, како и за активностите насочени кон зајакнување на финансиската стабилност и отпорноста на банкарскиот систем.

Соработката меѓу Народната банка и Светската банка опфаќа и техничка помош за подобрување на регулативата и супервизијата, развој на макропрудентните политики и унапредување на механизмите за управување со ризиците.

Од Народната банка оценуваат дека продолжувањето на партнерството со Светската банка ќе придонесе за поголема дигитализација на финансиските услуги, поефикасни плаќања и поблиско поврзување на Македонија со европскиот финансиски пазар.