Иран: Не планираме затворање на Ормускиот Теснец

Иран засега не планира да го затвори Ормускиот Теснец по нападите од САД и Израел, изјави иранскиот министер за надворешни работи Абас Арагачи во разговор за Ал Џезира.

— реклама —

Во оваа фаза не планираме да го затвориме Ормускиот Теснец, ниту да преземеме какви било мерки што би ја нарушиле пловидбата“, изјави шефот на иранската дипломатија.

Иран произведува околу 3,3 милиони барели нафта дневно и околу 1,3 милиони барели кондензат и други течни јаглеводороди. Во саботата беа регистрирани експлозии и на иранскиот остров Харг, на северот од Персискиот Залив, каде се наоѓаат терминалите преку кои се извезуваат околу 90 проценти од иранската нафта. Најголем купувач на иранската нафта е Кина.

— реклама —

Тензиите на Блискиот Исток нагло ескалираа откако американските и израелските сили во саботата извршија напади врз Иран. Техеран возврати со напади врз Израел и врз американски бази во земјите долж Персискиот Залив, вклучително и во големите производители на нафта и гас – Катар, Кувајт и Обединетите Арапски Емирати.

— реклама —

Во меѓувреме, повеќе сопственици на танкери, нафтени компании и трговски куќи го прекинаа транзитот на нафта, гориво и течен природен гас низ теснецот, кој во голем дел се наоѓа во иранските територијални води.

Сателитските податоци покажаа зголемен број бродови закотвени во близина на клучните пристаништа на Обединетите Арапски Емирати, како што е Фуџајра. Група поморски осигурителни компании, меѓу кои и Gard, Skuld, NorthStandard, London P&I Club и American Club, соопштија дека поради конфликтот го откажуваат покритието за воени ризици за бродовите во регионот на Персискиот Залив.

Низ Ормускиот Теснец дневно минуваат околу 20 милиони барели нафта и приближно една петтина од испораките на течен природен гас, главно од Катар, според податоците на Меѓународната агенција за енергија од 2024 година.