Иран се закани со одмазда кон секоја земја што ќе се приклучи кон новата американска кампања за економски притисок врз Техеран, додека Вашингтон најавува воведување секундарни санкции против држави, компании и други субјекти што продолжуваат да тргуваат со Иран.
Американскиот министер за финансии, Скот Бесент, најавениот потег го опиша како „најголема финансиска офанзива некогаш покрената против некој противник“. Целта на Вашингтон е дополнително да ја изолира иранската економија, шест месеци по почетокот на војната.
Во пресрет на американската објава, Обединетите Арапски Емирати, кои се најголем трговски партнер на Иран на Блискиот Исток, соопштија дека ја прекинуваат трговијата со Техеран. Иранските власти сметаат дека одлуката е координирана со Вашингтон.
Сега во фокусот се Кина, Индија и Русија и нивниот одговор на зголемениот американски притисок. Особено значајна е позицијата на Кина, која со години е најголем купувач на иранската нафта.
Пекинг веќе го осуди воведувањето еднострани санкции кои, според кинеските власти, немаат основа во меѓународното право. Портпаролот на кинеското Министерство за надворешни работи, Лин Џијан, порача дека воените средства, санкциите и политиките на притисок не се решение.
Сепак, сегашната ситуација е посложена од претходните американски обиди за економски притисок врз Иран. Испораките на иранска нафта кон Азија практично се запрени поради американската поморска блокада на иранските пристаништа.
Минатата недела и гувернерот на Централната банка на Иран, Абдолнасер Хемати, призна дека извозот на сурова нафта „практично запрел“.
Техеран, пак, возврати со остри закани. Иранскиот шеф за безбедност, Мохсен Резаеи, предупреди дека доколку Вашингтон ги спроведе најавените мерки, Иран ќе одговори со „силата на земјотрес“.
Особено ги предупреди соседните земји од Заливот да не се приклучуваат кон американската кампања.
„Ако земјите што го опкружуваат Иран им се придружат на Американците во нивната економска војна, ниту една капка нафта нема да го напушти Персискиот Залив и Ормускиот Теснец“, рече Резаеи.
Тој предупреди дека Иран би можел да преземе мерки и против други транспортни правци преку кои се извезува нафта од Заливот. Пловењето низ Ормускиот Теснец и онака е сериозно нарушено, што дополнително ги зголемува ризиците за глобалното снабдување со енергенси.
Иран во неделата дополнително го засили притисокот, ставајќи на црната листа 45 танкери поради наводно прекршување на правилата за минување низ Ормускиот Теснец.
Техеран се закани со парични казни, задржување на пловилата и запленување на нивниот товар, со што дополнително се зголемува неизвесноста околу еден од најважните светски енергетски коридори.
