Американското Министерство за правда обвини Иран дека преку мрежа за трговија со криптовалути во Кина „испрал“ повеќе од 1,5 милијарди долари од приходите од, како што тврдат американските власти, незаконската продажба на нафта. Министерството побара и заплена на 61 милион долари.
Според американското Министерство за правда, кинеските компании „Blessed Trust“ и „Hexa Whale“ биле дел од мрежата преку која приходите од продажбата на иранска нафта биле претворани во криптовалути и префрлани кон иранската влада, нејзини посредници и поврзани организации.
Компаниите користеле сметки на берзата за криптовалути „Binance“, со седиште во Обединетите Арапски Емирати. „Blessed Trust“ на финансиските и криптовалутните услуги им се претставувала како компанија за управување со имот и чување дигитален имот, но американските власти тврдат дека всушност примала и префрлала пари од продажбата на иранска сурова нафта и нафтени деривати и учествувала во нивното претворање во криптовалути.
„Hexa Whale“, според наводите, вршела слични услуги, претставувајќи се како посредник во трговијата со стоки.
Американското Министерство за правда тврди дека мрежата од поврзани криптовалутни адреси примила и префрлила повеќе од 1,5 милијарди долари од продажбата на иранска нафта. Дел од средствата, според наводите, бил пренасочен кон посредници кои работеле за Исламската револуционерна гарда, како и кон криптовалутни адреси и берза во Иран што американските власти ги поврзуваат со таа организација.
Во шемата наводно бил користен и американскиот финансиски систем, преку кој компаниите примиле или испратиле десетици милиони долари.
Американското Министерство за правда нагласи дека овие тврдења се дел од барање за заплена и дека допрва треба да бидат докажани пред суд.
Министерството бара заплена на 61 милион долари од приходите од продажбата на иранска нафта, тврдејќи дека станува збор за средства што подлежат на американски санкции и преку наведената мрежа биле претворени во криптовалути.
„Со овој потег покажуваме дека сме цврсто решени да им ги скратиме средствата на иранската влада и нејзините терористички сојузници со кои ја загрозуваат безбедноста на граѓаните“, изјави заменикот на американскиот државен обвинител Шон С. Бакли.
Иранската новинска агенција „Фарс“, пак, во неделата, повикувајќи се на неименуван извор, објави дека приходите на Иран од продажбата на нафта само од 23 август надминале 2,5 милијарди долари.
Според „Фарс“, во првите пет месеци од иранската година, која започнува на 21 март, приходите надминале 13 милијарди долари.
