Иранската војска до САД и Израел: Нема да се повлечеме, ќе се браниме до смрт

Иранските вооружени сили порачаа дека ќе ја бранат Исламската револуција „до смрт“ од, како што наведуваат, американската и израелската агресија.

Пораката е објавена во заедничко соопштение на Генералштабот на вооружените сили и Централната команда „Катам ал Анбија“, по повод годишнината од смртта на ајатолахот Рухолах Хомеини и одбележувањето на востанието од 15 Хордад.

— реклама —

Во соопштението, пренесено од иранската државна телевизија ИРИБ, САД и Израел се обвинуваат дека преку своите воени дејствија го покажале „вистинското лице на лажните застапници на човековите права“.

Како еден од примерите за, како што наведуваат, злосторства, иранските власти го посочуваат нападот врз училиште во Минаб, во кој, според нивните тврдења, загинале повеќе од 170 лица.

— реклама —

„Иранскиот народ нема да отстапи пред заканите и агресијата“, се наведува во соопштението.

Военото раководство додава дека вооружените сили ќе продолжат да ги бранат идеалите на Исламската револуција „до смрт“.

— реклама —

Во пораката е упатена и директна закана кон Вашингтон и Тел Авив.

„САД и Израел нема да имаат друг избор освен да се предадат пред божествената волја на вооружените сили и на просветениот и свесен народ“, се наведува во соопштението.

Истовремено, иранските власти ги повикаа граѓаните на единство и поддршка на државното раководство во услови на зголемени регионални тензии.

Годишнината од смртта на Хомеини, која се одбележува на 3 јуни, се совпаѓа со востанието од 15 Хордад во 1963 година, настан што во Иран се смета за еден од темелите на Исламската револуција.