Ирански функционер: Терористи убија најмалку 5.000 невини Иранци

Ирански висок функционер соопшти дека властите потврдиле дека во неодамнешните протести во Иран загинале најмалку 5.000 лица, меѓу кои и околу 500 припадници на безбедносните сили, при што за смртта на „невините ирански граѓани“ ги обвини „терористите и вооружените лица што предизвикувале нереди“.

— реклама —

Функционерот, кој побарал да остане анонимен поради чувствителноста на темата, за Ројтерс навел дека дел од најжестоките судири и најголемиот број жртви се случиле во курдските подрачја на северозападот на Иран, регион во кој дејствуваат курдски сепаратистички групи и каде што насилството традиционално е поизразено за време на периоди на немири.

— реклама —

„Не се очекува конечниот број на жртви значително да се зголеми“, изјавил функционерот, додавајќи дека „Израел и вооружени групи од странство“ ги поддржувале и опремувале учесниците во протестите.

— реклама —

Иранските власти редовно за немирите ги обвинуваат странските непријатели, меѓу кои и Израел, кој го сметаат за главен противник на Исламската Република и кој во јуни започна воени напади врз Иран. Од друга страна, американската организација за човекови права ХРАНА соопшти дека бројот на загинати изнесува 3.308 лица, додека уште 4.382 случаи сè уште се предмет на анализа. Организацијата потврдила и повеќе од 24.000 апсења.

— реклама —

Иранската курдска организација за човекови права Хенгав, со седиште во Норвешка, објави дека дел од најтешките судири за време на протестите, кои започнаа кон крајот на декември, се случиле токму во курдските подрачја на северозападот од земјата.