Иранските сојузници повторно зајакнуваат и покрај ударите од Израел

Три години по големите загуби што ги претрпеа во конфликтите на Блискиот Исток, вооружените групи поврзани со Иран повторно го зајакнуваат своето влијание во регионот, оценуваат аналитичари за CNN.

— реклама —

Според експертите, таканаречената „Оска на отпорот“, составена од проирански организации во Либан, Јемен, Ирак, Сирија и Газа, повторно станува значаен фактор во регионалните случувања, отворајќи нови фронтови против интересите на Израел и САД.

Аналитичарот Трита Парси од Институтот „Квинси“ оценува дека овие групи повеќе од две децении служеле како средство за одвраќање од директни напади врз Иран, но нивното слабеење по конфликтите што започнаа во 2023 година му овозможило на Израел и на САД директно да извршат притисок врз Техеран.

— реклама —

Израел во изминатите години ликвидираше повеќе лидери на проиранските организации, меѓу кои и поранешниот лидер на Хамас, Јахја Синвар, како и долгогодишниот лидер на Хезболах, Хасан Насрала, а изврши и бројни напади врз проирански позиции во регионот.

— реклама —

Сепак, според експертите, овие организации успеале да се приспособат на новите околности и повторно да ја координираат својата активност. Тие нагласуваат дека иако се блиски со Техеран, повеќето од нив имаат и сопствени политички и безбедносни интереси.

Како пример се наведуваат јеменските Хути, кои во последните денови ги засилија нападите врз Саудиска Арабија, таргетирајќи нафтени објекти и танкери во Црвеното Море, со што дополнително ги зголемија тензиите во регионот.

Според аналитичарите, Иран преку обновената активност на своите сојузници се обидува повторно да го зацврсти своето регионално влијание и да ја подобри својата позиција во односите со САД и Израел.