„Итно да се увезе лекот еритропоетин - одговорност од министерот Алиу и директорите Клековски и Алити“, велат од Левица

Политичката партија Левица преку соопштение изрази загриженост поради, како што наведува, недостигот на еритропоетинска терапија во здравствениот систем, која е неопходна за пациентите со трансплантиран бубрег и за лицата на дијализа.

— реклама —

Од партијата посочуваат дека, според поплаките од пациенти, препаратите како „Recormon“ и другите еквивалентни лекови веќе извесен период не се достапни во здравствените установи, без да биде обезбедена соодветна замена или информација кога проблемот ќе биде надминат.

— реклама —

Левица тврди дека поради ваквата состојба дел од пациентите се принудени сами да ја набавуваат терапијата од странство, додека други остануваат без неопходниот третман, што, според партијата, претставува сериозен ризик за нивното здравје.

Во соопштението се оценува дека прекин во снабдувањето со лекови од витално значење е недозволив и се обвинуваат Министерството за здравство и надлежните институции за несоодветно управување со системот.

— реклама —

Левица бара министерот за здравство Азир Алиу, директорот на Фондот за здравствено осигурување Сашо Клековски и директорот на Малмед Сабри Алити итно да ја информираат јавноста за причините за недостигот на еритропоетинската терапија, да презентираат план за нормализирање на снабдувањето и во најкус можен рок да обезбедат интервентен увоз на лекот.

— реклама —

Од партијата, исто така, бараат да се утврди институционална одговорност доколку се покаже дека недостигот е резултат на пропусти во планирањето, јавните набавки или управувањето со здравствениот систем.