Морничаво откритие во лозје во јужна Франција отвори истрага за можно убиство, откако земјоделски работник пронашол делумно изгорено тело на жена. Семејството на 29-годишната инфлуенсерка Сонија Белини, која исчезнала пред девет дена, стравува дека пронајденото тело е нејзино.
Телото било пронајдено меѓу редовите со винова лоза во департманот Гар. На местото биле испратени околу 40 жандарми, а истражителите извршиле детален форензички преглед во близина на Сен Жил, на околу 20 километри од Ним.
Идентитетот на жената официјално ќе може да биде потврден дури по завршувањето на ДНК-анализата. Обвинителството веќе потврдило дека е отворена истрага за убиство, но засега не соопштува детали за можниот сторител или мотивот.
Белини имала околу 260.000 следбеници на „ТикТок“ и била позната по кратки видеа во кои синхронизирала движења на усните со музика или филмски дијалози. Во септември требало да го прослави 30. роденден, а според француските медиуми, семејството веќе подготвувало прослава.
Нејзината сестра Миа изјавила дека Сонија во вечерта кога исчезнала имала договорена средба со маж со кого претходно се гледала.
Додека истрагата продолжува, семејството се соочува и со бројни гласини на социјалните мрежи, каде што се појавиле тврдења за наводна поврзаност на Сонија со ескорт-услуги. Нејзините блиски ги контактирале од „ТикТок“ и побарале отстранување на таквите објави.
Засега останува непознато како починала жената чие тело е пронајдено во лозјето, а клучен одговор за нејзиниот идентитет се очекува по ДНК-анализата.
