„Јас ги печалев, жена ми ги ставаше во ѕидот“ – таткото на судијата Ристов за скриените пари, обвинителката го соочи со ДНК-резултатите

„Нема шанса“, одговори Здравко Ристов, татко на судијата Ѓоко Ристов, откако обвинителката го соочи со резултатите од вештачењето, според кои на пронајдените пари не биле утврдени биолошки траги ниту од него ниту од неговата сопруга.

На денешното судење Ристов тврдеше дека парите пронајдени во семејната куќа во Неготино се негова и заштеда на сопругата, создадена со повеќедецениска земјоделска работа.

„Сум се мачел 89 години со овие десет прсти. На кого да ги пријавам тие пари?“, рече Ристов, објаснувајќи дека не им верува на банките и затоа дел од заштедата ја чувале дома.

Тој потврди дека во куќата биле извршени два претреса, првиот на 29 декември 2025 година, а вториот на 18 јануари 2026 година. Според неговото сведочење, при првиот претрес бил присутен и неговиот син Ѓоко, кој им помагал на лицата што го вршеле претресот.

— реклама —

„Ѓоко беше со нив, помагаше, го подместуваше фрижидерот, сè“, рече таткото.

Ристов тврдеше дека неговите деца не знаеле за скриените пари и дека уште при нивното пронаоѓање им кажал на истражителите дека заштедата му припаѓа нему и на сопругата.

„Кога ги најдоа парите, ме прашаа чии се. Јас им одговорив дека се лично наши, на сопругата и мои“, сведочеше тој.

Објаснувајќи како ја создавале заштедата, рече дека заработените пари ги менувал во менувачници, вклучително и во банкноти од 500 евра. Според него, за дел од замените не добивал документи.

— реклама —

„Секаде сум одел, каде што ќе најдам менувачница. Како сум ги печалел, така сум ги менувал. Ниту една менувачница не даваше документ дека сум менувал пари на црно“, изјави Ристов.

На прашањето како обезбедувал банкноти од 500 евра, раскажа дека имал познаник на Бит-пазар кој го известувал кога имало такви апоени.

„Имав пријател на Бит-пазар и ќе ми јавеше: Дојди да смениш, има пари“, рече тој.

— реклама —

Обвинителката го праша и за заштедите во банка, при што беше споменато дека тој и сопругата имале по речиси 15.000 евра. Ристов го потврди тоа, а на дополнително прашање кажа дека парите од продажбата на тракторот и останатите земјоделски машини ги уплатиле во банка.

За скривницата во семејната куќа тврдеше дека парите ги ставала неговата сопруга, додека тој работел и ги носел дома.

„Невестата ги ставаше парите во ѕидот. Јас создавав, да донесам дома“, рече Ристов.

Објаснувајќи зошто не им ги предал парите на децата, рече дека се плашел заштедата да не биде потрошена.

— реклама —

„Во една вечер можам да им ги дадам на децата, можат да ги искоцкаат во една вечер“, изјави тој.

Во завршниот дел од испрашувањето обвинителката го праша како е можно, доколку тој и сопругата ракувале со парите, резултатите од вештачењето да не покажале нивни биолошки траги.

„Нема шанса“, одговори Ристов.

Тој остана на тврдењето дека парите се семејна заштеда, додека прашањето за нивното потекло и резултатите од вештачењето се дел од доказите што треба да ги оцени Судот.